Ŋúnuyi 58 - Cebaara Bible 2010

Ŋúnuyi 58 Kolocɔlɔɔ i nyɛ naa tári na, wee wi kútiiw nyuu lè

¹ Ŋúnuŋùúbèle kùndigi wóʔo, ki joo lè «Mɔ a kɔ́ wi kpóo í.» Davidi tára-nyɔ́ɔ-na ŋúnugi.

² Kányɛʔɛ na, yele séew fɔ̀ɔlɔ, a yele yele nyɔ́ɔyi tɔ́n lé ní i kérigèle cɔɔnri ní sínnɛ ní? A yele i syɛ́ɛnbèle kútii nyuu lé ní sínnɛ ní?

³ Anbée ban gi nyɛ í! Yele n gi kɔ̀rirɔ ni námaraw kèlē kpéʔele. Yele kɔ́yi kapyere i nyɛ gàlagí tári ni.

⁴ Syɛɛnpeebèle n kólogi yaʔa nlaa yaà pe nɔ́ɔbèle láaya ni, jànvaafɔbèle i be pùununi sélegi nlaa yaà pe làrizeeli ni.

⁵ Sɔɔnrɔ i nyɛ be ni àmɛɛ wàbiga sɔ́ɔnrɔ nyɛ lè, pe i nyɛ àmɛɛ líiweepɛɛnnɛ wabisologo nyɛ, gee ki gi líiweegèle sɔ́ɔ lè.

⁶ Ki o fɔ̀lɔ́ ni wàbiyi ŋùuvɔɔlɔ ŋuumɔ lúro í. Alí wee wi wàbiyi kácanma myɛ cán lè be ni ni kpéʔele.

⁷ Ee Kolocɔlɔɔ, gǎngèle kabagi pe nyɔ́ɔyi ni! Ee Yawe, càarabiiyi kpàcɔʔɔlɔyɔ kabagi!

⁸ Pé cariga àmɛɛ lɔ̀ʔɔ gáà càmi n fala lè! Pe ga sedeyi kíle, ŋáayi í pye mɔ a jo a yi kabagi wii.

⁹ Ki n yɛlɛ be pye àmɛɛ kpàtɔɔ kúugo nyɛ, gee káfugo nyan lè, ní àmɛɛ fícarinaa-sìnlɛɛlɛ pya nyɛ, wee wi lè wi ga canʔa nyaa í.

¹⁰ Sáni yele kòdosɔʔɔgèle í wúuri káfugo taa lè, káfala-sìnjinni n téè kári ní di ní, ti wobiriri, wàlá ti wowaʔa-gwɔ́ɔri.

¹¹ Syɛɛnsinw a ba fundaanra taa àmɛɛ wi a ba kapeegèle gɔ̀lɔ́-wòloro nyaa lè, wi a ba wi tɔ́lɔyi jée syɛɛnpeebèle sìsyaan ni.

¹² Syɛ́ɛnbèle sáā gi nyuu si jo: «Tɔ̀nɔ i nyɛ syɛɛnsinw ma dɛ!» Si wɔ́ɔ ra gi nyuu si jo: «Kányɛʔɛ na, Kolocɔlɔɔ i yaà, wee wi kútiisinw cɛnɛ lè tári na.»