Ŋúnuyi 57 - Cebaara Bible 2010

Ŋúnuyi 57 Kolocɔlɔɔ wi lè Pe Myɛ Nyúngo na, mii i wi yiri

¹ Ŋúnuŋùúbèle kùndigi wóʔo, ki joo lè «Mɔ a kɔ́ wi kpóo í.» Davidi tára-nyɔ́ɔ-na ŋúnugi. Gee bee n pye lǎli ni wi fàn Sawuli na lè n sáà jée nyanbeweegi ni.

² Nyinimɛ taa mii na, ee Kolocɔlɔɔ, nyinimɛ taa mii na! Níì cán mɔ wi nyɛ mii pǐli tɛɛlaraga. Mɔ fókaanyi láara ni mii a jée bi kòro, fwɔɔ bi taa wɔʔɔgi í sɔ̀lɔ.

³ Mii i yákpoli wáa Kolocɔlɔɔ kurugo, wi lè Pe Myɛ Nyúngo na, Kolocɔlɔɔ kurugo, woro wee wi lè mii kérigèle cɔɔnrifɔlɔ.

⁴ Mii wɔʔɔfɔw ga yìri mii kurugo, Kolocɔlɔɔ n syɔɔli yìrige yaà nyɛ̀ʔɛni na n tórigo naa mii ma. Ŋɔ́ndaala Kolocɔlɔɔ i wi funjǎngi ní wi kányɛɛgi tórogi naa.

⁵ Mii pǐli i nyɛ càarabēle nínge ni, syɛ́ɛnbèle bele nínge ni mii sínɛ lè, naà i yirigi be nyɔ́ɔyi ni. Pe gǎngèle i nyɛ àmɛɛ tàbaa ní ŋaaya nyɛ lè. Pe nyíngèle i nyɛ àmɛɛ ŋɔséetàanbēle nyɛ lè.

⁶ Ee Kolocɔlɔɔ, ki n yɛlɛ mi lúgu yaà nyɛ̀ʔɛgèle ǹjoʔo ni! Mɔ nijangbɔɔri í pye tári myɛ ǹjoʔo ni.

⁷ Pe n cɔ̀ɔ cáan mii kólogi ni. Mii pǐli n fàbiga. Pe n weʔe túgu mii yɛ́ʔɛ ma, a be tiimaw too gi ni. Ŋɔ́ndaala

⁸ Mii fúngi n sámaga n tɛ́ɛn, ee Kolocɔlɔɔ! Mii fúngi n tɛ́ɛn. Mii a ra ŋúu, mii a ra kpɔ̀ʔɔrɔli ŋúnugo ŋúu.

⁹ Ni fungo, ki n yɛlɛ mi yìri ŋúnɔmi na! Ye yìri mii kɔ̀ríw ní mii dǎngboli! Níì cán ki n yɛlɛ mii í nyǐnjerigi yìrige.

¹⁰ Ee Kàfɔw, mii a ra mɔ kpɔ̀ʔɔrɔ́ syɛɛnfeleyi nínge ni, mii a ra mɔ kpɔʔɔrɔli ŋúnuyo ŋúu syɛɛnfeleyi nínge ni.

¹¹ Níì cán mɔ funjǎngi n kári fwɔɔ n sáà nan nyɛ̀ʔɛgèle na, a mɔ kányɛɛgi kári fwɔɔ n sáà nan fàfaanyi na.

¹² Ee Kolocɔlɔɔ, ki n yɛlɛ mi lúgu yaà nyɛ̀ʔɛgèle ǹjoʔo ni! Mɔ nijangbɔɔri í pye tári myɛ ǹjoʔo ni!