Ŋúnuyi 56 - Cebaara Bible 2010

Ŋúnuyi 56 Wee be wɔʔɔ lè wi n wiyɛɛ daʔa Kolocɔlɔɔ kajoo-mí-cerili na

¹ Ŋúnuŋùúbèle kùndigi wóʔo. «Léelige tiitɔnɔyi kàtolo na.» Davidi tára-nyɔ́ɔ-na ŋúnugi. Gee bee n pye lǎli ni Filisitini syɛ́ɛnbèle wi cò Gati ni lè.

² Ee Kolocɔlɔɔ, nyinimɛ taa mii na! Níì cán syɛ́ɛnbèle i tìngí ni tɔ́ngi mii na. Pe i nyɛ kapɛɛnnɛ na ní mii ní canbogi myɛ ni, pe n mii kpɛnʔɛri.

³ Bele be mii laba lè pe i tìngí ni tɔ́ngi mii na canbogi myɛ ni. Pe n nɛʔɛ, bele be kapɛɛnni kpúmɔn ní mii ní lè ní nɛ̀ɛnyɛnɛgɛ ní!

⁴ Mii ga ni fɛ̀ɛgí cángee na lè mii n mii sɔ̀ngumi taʔa mɔ na.

⁵ Mii i Kolocɔlɔɔ kpɔ̀ʔɔrɔ́ wi syɛ́ɛnri kéele na wi joo lè, woro na mii mii sɔ̀ngumi taʔa, mii ní o fɛ̀ɛgí í. Nyàʔá syɔɔn a gbǎn kpéʔele mii na?

⁶ Pe i mii fɔ̀rɔgí ní be syɛɛnjóori ní. Kapeeyi be tímana ní mii ní yagana.

⁷ Pe i nyɔɔkuunro kpéʔele, níì peyɛɛ làriga, pe i mii túluyi tɔ́rɔ àmɛɛ pe mii caa lè kpóomɔ.

⁸ Pé zǐn syɔɔ lé sìnzinmi báriga ni? Ee Kolocɔlɔɔ, ki n yɛlɛ mɔ fundanʔaratɔw í syɛɛnfeleyi cáan tári na!

⁹ Mɔ i mii curugo-mí-màʔani nyɔ̌ngéle córo. Mii nyatinmi le mɔ kpabiw ni, pi kéeli ga sɛ́bɛ mɔ sɛ́bɛw ni ì?

¹⁰ Mii ga mɔ mɛ́ɛgi yeri cángee lè, mii nigoobèle a lúru kàdoʔo ma. Mii n gi cán, Kolocɔlɔɔ, mɔ i nyɛ ní mii ní.

¹¹ Kolocɔlɔɔ kéeli na woro wee syɛ́ɛnrɛ mii sòoló lè, Yawe kéeli na woro wee syɛ́ɛnrɛ mii sòoló lè.

¹² Kolocɔlɔɔ na mii mii sɔ̀ngumi taʔa, mii ní o fɛ̀ɛgí í. Nyàʔá syɔɔn a gbǎn kpéʔele mii na?

¹³ Ee Kolocɔlɔɔ! Nyɔɔfaliyi mii kpéʔele mɔ ma lè, mii n yɛlɛ bi yi foro, mii a bariga kaanna sáriga wòlo mɔ ma.

¹⁴ Níì cán mɔ n mii pǐli syɔɔ kùu ma. Mɔ n mii tɔ́lɔyi yirige toolo ni, koro ga pye mii í da táanri mɔ Kolocɔlɔɔ yɛ́ʔɛ ma, niweebèle gbɛ̀ɛnmɛ na.