Ŋúnuyi 55 - Cebaara Bible 2010

Ŋúnuyi 55 Syɔ́ɔnwee be jànváa lè woro nyɛ́ɛrigi

¹ Ŋúnuŋùúbèle kùndigi wóʔo. Ní kɔ̀ríbèle ní. Tamani ŋúnugo Davidi ŋùu lè.

² Ee Kolocɔlɔɔ, mɔ líiyi cáan mi mii nyɛ́ɛrigi lóʔo, mɔ a kɔ́ làra mii na mii nyɛ́ɛrigbɔɔgi làla ni í,

³ Líiyi cáan mii ma, mí mii nyɛ́ɛrigi lóʔo! Mii i curugu ni máari ní i ŋɔngi ni fɔ̀ngí, mii i cɛ̀lɛ́,

⁴ mii nigoow yákpolo báriga ni, ní wɔʔɔgi báriga ni, gee syɛɛnpeew taari mii na lè. Níì cán pe i fɔ̀rɔgi cáan mii na, pe i nyɛ mii kurugo ní fundanʔara ní.

⁵ Mii zɔ̌nw i cɛ̀lɛ́ mii ni, kùúw fyáakpɔɔrɔ si i mii có.

⁶ Zɔ̀nviikɔniri ní fyáari i nyɛ mii na, fyáakpɔɔrɔ n mii le nínge.

⁷ A mii jo: «Wìí wi a fókaanya kaan mii ma àmɛɛ kàtolo nyɛ lè? Mii mǎà dée yìri bi sa tɛɛ̀ŋɔndaala taa.

⁸ Wéle, mii a dée fàn bi kári léelige, mii a dée sa kòro fìími tára ni. Ŋɔ́ndaala

⁹ Mii a dée fàn kelekele bi làra káfalakpɔɔgi, ní zěkpɔɔgi na.»

¹⁰ Pe jɔ́ɔ, Kàfɔw, ki n yɛlɛ mi be syɛ́ɛnri nyáʔami! Níì cán gee mii nyaa lè kěgi ni, koro gi nyɛ gàlagíw ní kàsiiw.

¹¹ Pe i nyɛ tǒw ǹjoʔo ni, ni gi máari canʔa ní yébilige, sìnzinmi ní péemi i nyɛ gi fúngi ni.

¹² Kapeeyi i nyɛ gi fúngi ni, syɛɛnfaana-pùunigi ní námara o fɔ̀ngí gi syɛ́ɛnmi tɛɛ̀kpoʔoroyo ni í.

¹³ Mii nigoo ban wi da ni mii faari í, mii mǎà dée gee bee kpàraco. Mii parafɔlɔ ban wi da yìri mii kurugo í, mii mǎà dée làra wi na.

¹⁴ Kàjáa mɔ wii, mɔ wi lè mii syɛɛnnyɛnw, ní mii pínɛnyɛnw, ní mii tàannyɛngbɔɔw!

¹⁵ Wo kòrogi maa tɔ̀nɔ n kpɔ́ʔɔ cama, wo maa pínɛ ni syée syɛɛnnɛʔɛmi nínge ni, Kolocɔlɔɔ kpáagi ma.

¹⁶ Ki n yɛlɛ kùúw í be pàla, pe woweebèle í tìgi kúbèle tɛɛkòrogo ni, níì cán péemi i nyɛ be tɛɛkòrogi ni, pi i nyɛ pe níngi ni.

¹⁷ Mii si na, mii i Kolocɔlɔɔ yiri, Yawe a mii syɔɔ.

¹⁸ Cângwɔɔgi nyɔ́ɔ, ní nyǐngi nyɔ́ɔ, ní cânvugi na, mii i sùpili wáa ní i cɛ́ɛn, wi si i mii yákpoli lúro.

¹⁹ Kapɛɛnni li da pye mii na lè, wi n mii syɔɔ li ma níì mii ŋɔ́n n daa, lǎli ni be pan lè wonɛʔɛbéle ní mii kánmi na.

²⁰ Kolocɔlɔɔ a lóʔo mii ma si be cɛ́rɛ, woro wee wi yaà lè wodɛ́ɛɔn ní fàngoli na làla o làla. Ŋɔ́ndaala Poro bele be lè pe ga fàli í, pe o fɛ̀ɛgí Kolocɔlɔɔ na í.

²¹ Wi ní bele pe da pye lè bɛ̀ɛlɛ na, wi n kɔ́yi yìrige bele bee kánma na, wi n wi joogaanni kálagi.

²² Wi nyɔɔsyɛɛnri i nyɛ àmɛɛ nàará nyɛ lè, kàjáa kàsiiw i nyɛ wi fúngi ni. Wi syɛ́ɛnri n pe n sɔ̀lɔ sìnmɛ na, ní si i nyɛ ŋɔséetàanbēle.

²³ Mɔ túgori tìrige mi taʔa Yawe na, wi a mɔ tɔʔɔ bi yérige, wi a tée fɔ̀lɔ yarigaa í syɛɛnsiɔn cúngo nyáana í.

²⁴ Mɔ si na, Kolocɔlɔɔ, mɔ a be tìrige bi lége kálagili wéʔe ni. Bele be jànvaaw kpéʔele ni syɛ́ɛnbèle kúu lè, pe a tée be sìíw canya tíla taa í. Mii si na, mɔ na mii mii sɔ̀ngumi taʔa.