Ŋúnuyi 53 - Cebaara Bible 2010

Ŋúnuyi 53 Tágala syɛ́ɛnbèle, ní be Kolocɔlɔw dulunyan-gálagiw ni

¹ Ŋúnuŋùúbèle kùndigi wóʔo, fɔ̀rɔgi làla ni. Tamani ŋúnugo Davidi ŋùu lè.

² Nilabalaga ki gi nyuu kiyɛɛ fúngi ni níì jo: «Kolocɔlɔɔ o yaà í!» Pe n peyɛɛ gálagi, pe n kapeekpoloyo kpéʔele. Gee be kpéʔele lè, ki n kolo níì nɔ́nʔɔ. Syɔɔn faala o beè, wee wi kacàngēle kpéʔele lè í.

³ N Kolocɔlɔɔ yaʔa nyɛ̀ʔɛni na, wi n wi nyúngi jùngu ni syɔɔn ye wéle bi gi nyaa kapye wàa i yaà, wee wi cìlige lè, wee wi Kolocɔlɔɔ caa lè.

⁴ Pe myɛ n wàli n léeli, pe n pínɛ n kálagi. Syɔɔn faala o beè, wee wi kacàngēle kpéʔele lè í, àlí syɔɔn nibin.

⁵ Kakolobyebèle ga yarigaa cán wii ì? Pe i mii syɛ́ɛnbèle káa, pe i be líi àmɛɛ búru nyɛ lè, pe o Kolocɔlɔɔ mɛ́ɛgi yeri í.

⁶ Fyáara n be cò yaà, a be i cɛ̀lɛ́, bi gi taa fyáara yáriga da pye yaà í, níì cán wee wi tɛ́ɛn mɔ taana kapɛɛnni kánma na lè, Kolocɔlɔɔ n wee bee fɔ́lɔ kacere cariga, mɔ n fɛ̀ɛrɛ wáa be na, níì cán Kolocɔlɔɔ n be cée.

⁷ Ee mii i caa bi Isirayɛli syɔɔli nyaa, lee li a yìri Siyɔn ma lè, lǎli ni Kolocɔlɔɔ ga wi syɛ́ɛnbèle yirige púlori ni a be lúru n pan lè, lǎli bee ni Zyakɔbi a ra muguri, Isirayɛli a ra fundaanra kpéʔele.