Ŋúnuyi 51 - Cebaara Bible 2010

Ŋúnuyi 51 Kapeele kùsulugo nyɛ́ɛrigɛ

¹ Ŋúnuŋùúbèle kùndigi wóʔo. Davidi ŋúnugi.

² Lǎli ni kanyaajoow Natan kári wi ma lè, wi sínɛni kàdoʔo ma ní Bati-Syeba ní.

³ Ee Kolocɔlɔɔ, nyinimɛ taa mii na mɔ funjǎngi báriga ni, mii kolomi kèlē kurugo mi láʔa yaà mɔ nyinidaari báriga ni.

⁴ Mii wéli mi mii kolomi myɛ láʔa mii na, mii kapeeli jée mi láʔa mii na.

⁵ Níì cán mii n mii kolomi kèlē cán, mii kapeeli si i nyɛ mii yɛ́ʔɛ ma làla o làla.

⁶ Mii n kapeele pye mɔ na, mɔ nibin na mii li pye. Mii n kapeʔe kpéʔele mɔ yɛ́ʔɛ ma, koro na mɔ ga gee joo lè, tànʔa a pye mɔ ma, mɔ a pye dìgire fun mɔ kútiiw cerile ni.

⁷ Wéle, pe n mii see kolomi ni, mii nɔ́ɔw tɛ́nɛ̀ mii fícɛnni taa lè, a mii pye kapeebyeo.

⁸ Kàjáa ki n mɔ dɛ́nɛ bi kányɛɛgi nyaa syɔɔn fúngi ni, mii tama sícilimi na mii fúngi tɛɛlarala ni yaà.

⁹ Fɔ́ɔnri láʔa mii na ní hizɔpi wára ní, mii a sámaga mùnu. Mii wéli, mii a fílige bi sɔ̀lɔ lànɛɛzyiw na.

¹⁰ Ki yaʔa mii í mugurumɔ, ní fundaanra kéele lóʔo, koro ga pye kaceleyi mɔ kabagi lè, yoro a ra muguri.

¹¹ Mɔ yɛ́ɛgi làriga mii kapeegèle na, mii kolomi kèlē myɛ kurugo mi láʔa yaà.

¹² Ee Kolocɔlɔɔ, ki n yɛlɛ mi funjànga kpéʔele mii ni, mí mii pǐli kàriga wovɔnnɔ ní, mí li sámaga mi télege.

¹³ Mɔ a kɔ́ mii yirige miyɛɛ yɛ́ʔɛ ma bi wáa léelige í, mɔ a kɔ́ mɔ Piicanni láʔa mii na í.

¹⁴ Syɔɔli mɔ kaangi lè, ki n yɛlɛ mi ní mi li fundaanri kaan mii ma, kínidɛnɛcǎngi pìle si mii cò bi yérige.

¹⁵ Mii sáā mɔ lalwaw kálagifɔɔlɔ tama mɔ kóloyi na, kapeebyebèle si lúru pan mɔ ma.

¹⁶ Ee Kolocɔlɔɔ, mɔ wi lè mii syɔɔli Kolocɔlɔɔ, mii syɔɔ sìsyaanw ma mii wo lè, mii nyínni a ra ŋúnugo ŋúu ní yákpogbɔɔlɔ ní bàā mɔ sínni kéele nyuu.

¹⁷ Ee Kàfɔw, mii nyɔɔwari sánʔa mi yaʔa koro ga pye mii nyɔ́ɔgi a ra mɔ kpɔ̀ʔɔrɔ́ da láʔala.

¹⁸ Níì cán mɔ o fundaanra kpéʔele sáriga kéele na í, kapye koro ban í, mii a dée wàa wòlo. Sáriga-sórigoo o fundaanra kaangi mɔ ma í.

¹⁹ Kolocɔlɔɔ sáriga-nidaanmaw wi nyɛ, syɔ́ɔnwee wi nyaan wi fúngi ni lè. Ee Kolocɔlɔɔ, fúngee gi nyaan lè níì kàdoʔo wáa, mɔ o gi faari í.

²⁰ Kacànna kpéʔele Siyɔn na bi yɛlɛ ní mɔ kínidɛnɛgi ní, ní mi Zyerusalɛmi gúnyi faan.

²¹ Lǎli bee ni sínni sáriga a mɔ dɛ́nɛ, wi lè sáriga-sórigow ní sárigaw yaweegéle be sórogi lè ke myɛw. Lǎli bee ni pe a ra náapegèle wóo sáriga, mɔ sáriga-wòlo-yafaangi na.