Ŋúnuyi 5 - Cebaara Bible 2010

Ŋúnuyi 5 Syɔɔnwee na Yawe fɔ̀lɔ lè, woro nyɛ́ɛrigi

¹ Ŋúnuŋùúbèle kùndigi wóʔo, gee be ŋúu ní maagéle ní lè. Davidi ŋúnugi.

² Yawe, líiyi cáan mi mii jóomi lóʔo! Ki n yɛlɛ mi mii cɛ́ɛnmi lóʔo!

³ Mii sùpili lóʔo, lee mii wáa ni mɔ yiri lè, mii Fànʔafɔw, ní mii Kolocɔlɔw! Mɔ má mii nyɛ́ɛri.

⁴ Ee Yawe, nyǐngi nyɔ́ɔ na, mɔ i mii yákpoli lúro. Nyǐngi nyɔ́ɔ na, mii i mii nyɛ́ɛrigi kèlē tèé mɔ na, ní i sige.

⁵ Mɔ o nyɛ kolocɔlɔwaa, wee péemi dɛ́nɛ lè í, syɛɛnpeeo tɛɛ̀tɛ́ɛnnɛ a gbǎn taa mɔ taana í.

⁶ Bele be peyɛɛ gbɔ́ʔɔgi lè, tɛɛ̀yérele a gbǎn taa be ma mɔ yɛ́ʔɛ ma í. Kakolobyewaa faala kéele ga mɔ dɛ́nɛ í.

⁷ Mɔ i jànvaafɔbèle kúu. Syɛɛnkpoobèle ní námarafɔbèle kéele ga Yawe dɛ́nɛ í.

⁸ Mii si na, mɔ nyinigbɔɔmi báriga ni mii a jée mɔ kpáagi ni bàā kpùmɔnɔ́ da yɛ́ɛgi wáa mɔ kpɔʔɔrɔli tɛɛcànga ma ní mɔ yɛ́ɛgi fyáara ní.

⁹ Ee Yawe, mii yɛ́ɛgi kíni mɔ sínni ni, mii nígoobèle kéele na, mí mɔ kólogi sámaga mii yɛ́ʔɛ ma.

¹⁰ Níì cán tágala jóomɔ o nyɛ pe nyɔ́ɔyi na í. Gàlagíw yagana wi nyɛ be fúnyi ni, pe yákpodiriyi i nyɛ àmɛɛ nyawee-múguyaʔaga nyɛ lè, pe i syɛ́ɛnbèle lɛ́ɛlɛ ní be nyíngèle ní.

¹¹ Ee Kolocɔlɔɔ, pe cò àmɛɛ be nyɛ lè kolomɔfɔɔlɔ! Ki n yɛlɛ be kakɔrirɔgèle í pan ní be tooli ní! Pe nɛnɛ be kapeenɛʔɛgèle kéele na ke lè ke a gbǎn córo í, níì cán pe n mɔ cée.

¹² Lǎli bee ni bele myɛ pe peyɛɛ kàlifáa mɔ ma lè, poro a ra fundaanra kpéʔele, pe a ra muguri canʔa o canʔa, mɔ si sínɛ bi be tɔ́n. Bele mɔ mɛ́ɛgi kéele dɛ́nɛ lè, poro a ra muguri mɔ bárigaw ni.

¹³ Níì cán Yawe, mɔ i dùba taari syɛɛnsiɔn na. Ee Yawe, mɔ kacǎnni n be màʔa n pye be ma àmɛɛ tunmɔzige-yariga nyɛ lè.