Ŋúnuyi 49 - Cebaara Bible 2010

Ŋúnuyi 49 Syɔɔn lariguuli ni, wi a kári ní yafyɛn ní í

¹ Ŋúnuŋùúbèle kùndigi wóʔo. Kore jáabèle ŋúnugo.

² Yele syɛɛnfeleyi myɛ, ki n yɛlɛ ye gee naa lóʔo, yele dulunyanw syɛ̀ɛnnɛ myɛ, ye líiyi cáan,

³ mɛ́ɛpiigèle fɔ̀ɔlɔ, ní mɛ́ɛkpoloyi fɔ̀ɔlɔ, lɔrɔfɔbèle ní fɔ̀ngɔfɔbèle!

⁴ Mii nyɔ́ɔgi a sícilimɛ syɛ́ɛnrɛ joo, mii fúngi sáā sɔ̀ngí sícilimi kèlē na.

⁵ Mii a mii líiyi cáan bi kàseele lóʔo, mii a mii kàseeli kɔ́rɔ joo bi tɛ̀ɛn kɔ̀ríw ni.

⁶ Nyàʔá na mii a ra fɛ̀ɛgí wɔʔɔgi canya na, lǎli ni mii kàsiitun-nyɛ́nbèle kolomɔ ga mii le nínge lè?

⁷ Pe n be sɔ̀ngumi taʔa be kɔlɔ̀ yáriri na, ní i peyɛɛ gbɔ́ʔɔgi pe lɔnɛʔɛri kéele na.

⁸ Pe wàa a gbǎn wi pínɛnyɛnnɛ syɔɔ í, wi a wɔ́ɔ gbǎn wi nyùnzyɔɔri sàra kaan Kolocɔlɔɔ ma í.

⁹ Pe nyùnzyɔɔri lɔ́rɔ n nɛʔɛ, ti a gbǎn taa nyáana í.

¹⁰ Wi kòro lé beè sìi na làla o làla bi syɔɔ nyanweegi ma?

¹¹ Níì cán wo i gi nyaagi sícilibèle i kúu, a nilabalabèle, ní nidoliyi wɔ́ɔ i kúu, ní i be lɔ́ri yaari pèle nikwɔɔlɔ ma.

¹² Pe i gi sɔ̀ngí poro kpáayi a kòro beè làla o làla, poro tɛɛkòroyi í pye beè làrigèle myɛ syɛ̀ɛnnɛ nínge ni, poro bele pe da be mɛ́ɛyi taʔa be tári na lè,

¹³ kàjáa mɛ́ɛkpɔʔɔfɔlɔ a mɔn beè í, wi ní yaweeri i nyɛ sèjira dee di kúu lè.

¹⁴ Bele be tága peyɛɛ na lè nyùngo fun, koro gi nyɛ be kwɔ́ɔmi. Pe syɛ́ɛnri si i be taʔafɔbèle dàán. Ŋɔ́ndaala

¹⁵ Pe i nyɛ àmɛɛ yaweere gboolo nyɛ lè ni jǐn kúbèle tɛɛkòrogo ni, kùúw si i nyɛ be nàʔafɔw. Cɛɛri na, syɛɛnsinbèle a ra be kàragí, pe nìjanri i kwóo, kúbèle tɛɛkòrogo gi nyɛ pe tɛɛkòrogi.

¹⁶ Kàjáa Kolocɔlɔɔ a mii pǐli syɔɔ kúbèle tɛɛkòrogo ma, níì cán wi a mii láa. Ŋɔ́ndaala

¹⁷ Fyáara a kɔ́ mɔ cò lǎli ni syɔɔnwaa lɔ́ri taa lè í, ní lǎli ni wi kpáagi yárira nɛʔɛgi lè í.

¹⁸ Níì cán wi ga kùu lǎli ni lè, wi a kári ní yafyɛn ní í, wi lɔnɛʔɛri a pínɛ jée ní wi ní nyángi ni í.

¹⁹ Wi wéemi làla ni, wi maa ni wiyɛɛ sɔ̀ngi dùba pyà. Pe a ra mɔ sòoló níì cán mɔ n fundaanra taa,

²⁰ koro ní ki myɛ ní mɔ a ba kári mɔ tóolɛɛbèle tɛɛ̀káriga ni, pe lè pe a ní gbɛ̀ɛ́nmi nyaa nyáana í.

²¹ Syɔ́ɔnwee mɛ́ʔɛ gi kpɔ́ʔɔ lè, wi si ga cìlige í, wi ní yaweeri i nyɛ sèjira dee di kúu lè.