Ŋúnuyi 48 - Cebaara Bible 2010

Ŋúnuyi 48 Fànʔafɔgbɔɔw kàʔa

¹ Ŋúnugo. Kore jáabèle ŋúnugo.

² Yawe n kpɔ́ʔɔ, woro na sòololi myɛ yɛlɛ, wolo Kolocɔlɔw kàʔa ni, ki lè wi nyanbejǎngi.

³ Dǎndamagi gi nyɔɔ lè, ki lè tári myɛ fundaanra yáriga, koro gi nyɛ Siyɔn nyanbelegi solomɔkulo kàbangi na, ki lè fànʔafɔgbɔɔw kàʔa.

⁴ N Kolocɔlɔɔ yaʔa wi kpaakpoloyi ni, wi n wiyɛɛ dɛ̀ɛn kpaataʔa-tɔ́nɔgɔ.

⁵ Wéle, fànʔafɔbèle maa bɛ̀ɛ nibin na, níì pínɛ n yìri ni syée ki kánmi na.

⁶ A be sáà gi wéle ní i káama, a fyáari be cò a be fàn.

⁷ A be i cɛ̀lɛ́ yaà, a gi pye be na àmɛɛ cɔlɔɔ fícɛnnɛ yáala nyɛ, wee wi nyɛ seeli na lè.

⁸ Wàlá àmɛɛ canʔafolomɔ kabangi káfalaga Tarisiisi kɔ́rɔkpoloyi jabagi lè.

⁹ Gee wolo da lóʔo lè, koro wolo nyaa Yawe kěgi ni wi lè Nyɛ̀ʔɛni Sùlasiibéle Kafɔlɔ, wolo Kolocɔlɔw kàʔa ni, Kolocɔlɔɔ a gi sámaga yérige, gi kòro beè làla o làla. Ŋɔ́ndaala

¹⁰ Ee Kolocɔlɔɔ, bi wolo yaʔa mɔ kpɔʔɔrɔli kpaʔa nínge ni, wolo i sɔ̀ngí mɔ funjǎngi kéele na.

¹¹ Ee Kolocɔlɔɔ, àmɛɛ mɔ mɛ́ɛgi yiri lè, ànbée mɔ soololi yiri fwɔɔ n sáà nan tári láʔala na. Mɔ kaliigi n nyìn sínni na.

¹² Siyɔn nyanbelegi i fundaanra kpéʔele, Zyuda calipiigèle i muguri mɔ kútiijoori kéele na.

¹³ Ki n yɛlɛ ye Siyɔn fàn ye foro, ye gi kpaataʔa-tɔ́nɔyi córo.

¹⁴ Ye gi tǒw kɔ̀rɔsíi, ye gi kpaakpoloyi sámaga ye wéle, koro ga pye yele í kɔ́ ba ra gee bee nyuu yele kàdoʔo ma wóbèle ma.

¹⁵ Kolocɔlɔw bee si wi nyɛ wolo Kolocɔlɔw làrigèle myɛ ni kwɔ́ɔmɔ fun. Woro wi a pye wolo yɛɛ̀kiniw fwɔɔ bi taa sa nan kùúw na.