Ŋúnuyi 47 - Cebaara Bible 2010

Ŋúnuyi 47 Yaa kadaagèle kóri Yawe ma wi lè fànʔafɔgbɔɔw

¹ Ŋúnuŋùúbèle kùndigi wóʔo. Kore jáabèle ŋúnugo.

² Yele syɛɛnfeleyi myɛ, yaa kadaagèle kóri! Yaa fundaanra yákpogéle wáa Kolocɔlɔɔ ma!

³ Níì cán Yawe wi lè Pe Myɛ Nyúngo na, wi i nyɛ fyáakpɔɔrɔ yáriga. Wi i nyɛ fànʔafɔgbɔɔɔ tári myɛ nyúngo na.

⁴ Wi i syɛɛnfeleyi kàragí ni kaangi wolo ma, wi i tári syɛɛnfeleye cáan wolo tɔ́lɔyi láara ni.

⁵ Wi n wolo kɔ́rigi nyɛ́nɛ n wòlo wolo ma, ki lè wi syɛɛn-nidaanmaw Zyakɔbi nìjanri. Ŋɔ́ndaala

⁶ Kolocɔlɔɔ i lúru ǹjogi ni fàndaara yákpowáara ni, Yawe i lúru tòmaʔa wiimɛ ni.

⁷ Yaa Kolocɔlɔɔ kpɔ̀ʔɔrɔli ŋúnuyo ŋúu, yaa kpɔ̀ʔɔrɔli ŋúnuyo ŋúu! Yaa wolo fànʔafɔw kpɔ̀ʔɔrɔlɔ ŋúnuyo ŋúu, yaa kpɔ̀ʔɔrɔli ŋúnuyo ŋúu!

⁸ Níì cán Kolocɔlɔɔ i nyɛ fànʔafɔlɔ tári myɛ nyúngo na, yaa kpɔ̀ʔɔrɔli ŋúnugo ŋúu ki lè tamani wóʔo!

⁹ Kolocɔlɔɔ i nyɛ fǎngi na wodɛ́ɛɔn ní syɛɛnfeleyi nyúngo na, Kolocɔlɔɔ n tɛ́ɛn wi fàngoricǎnni na.

¹⁰ Syɛɛnfeleyi fànʔafɔbiigéle i kpóʔoro ní Kolocɔlɔɔ syɛ́ɛnbèle ní wi lè Abirahami Kolocɔlɔw. Níì cán fànʔafɔbèle be nyɛ lè tári na, Kolocɔlɔɔ wòolo bɛɛ. Wi i nyɛ pe myɛ ǹjoʔo ma píri.