Ŋúnuyi 46 - Cebaara Bible 2010

Ŋúnuyi 46 Yáriri myɛ Kàfɔlɔ i nyɛ ní wolo ní

¹ Ŋúnuŋùúbèle kùndigi wóʔo. Kore jáabèle wóʔo. Yákpobiigèle ni. Ŋúnugo.

² Kolocɔlɔɔ wi nyɛ wolo má tɛɛlaragi, ní wolo fǎngi, wi i nyɛ syɔɔfɔlɔ làla o làla kagbanyi làla ni.

³ Gee bee na wolo nyɛ fyáara fun ni, àlí tári ga wáa n kàri, àlí nyanbeleyi ga kɔ́n n sáà too sólomi lòyo tɛɛcùruyo ni.

⁴ Alí yi lǒyi ga ni fúlo, ní i kángi ni yìrigí n nyanbeleyi kaan yi i cúngu. Ŋɔ́ndaala

⁵ Cábigaa i yaà, ki lókoloyi i nyɛ Kolocɔlɔɔ kěgi fundaanra, wee wi lè Pe Myɛ Nyúngo na, woro tɛɛkòroyi tɛɛcàndelege ni.

⁶ Kolocɔlɔɔ i nyɛ gi níngi ni, yafyɛn a gbǎn gi cúngo í. Kolocɔlɔɔ i gi dɛ̀ɛmɛ́ bi séli nyǐnjerigi na.

⁷ Syɛɛnfeleyi i kaana, fǎnyi i cúngu, wi n wi yákpoli wáa, a tári nyan.

⁸ Yawe wi lè Nyɛ̀ʔɛni Sùlasiibéle Kafɔlɔ, wi i nyɛ ní wolo ní. Zyakɔbi Kolocɔlɔw i nyɛ wolo ma kènirige. Ŋɔ́ndaala

⁹ Yaa maa ye ba Yawe kapyegèle sámaga ye wéle, ye ba kálagigbɔɔli wéle, lee wi taʔa tári na lè.

¹⁰ Woro wi kapɛɛngèle yéregi fwɔɔ n sáà nan yaà tári láʔala na. Wi i sedeyi kabagi, ní i tàbaabèle cɛnɛ. Wi i kapɛɛnkpumɔn-wòtorobèle sórogi ní naà ní.

¹¹ Wi n jo: «Ye yére, ye gi cán mii wi nyɛ Kolocɔlɔɔ, mii wi nyɛ syɛɛnfeleyi nyúngo na, mii wi nyɛ tári nyúngo na.»

¹² Yawe wi lè Nyɛ̀ʔɛni Sùlasiibéle Kafɔlɔ, wi i nyɛ ní wolo ní. Zyakɔbi Kolocɔlɔw i nyɛ wolo ma kènirige. Ŋɔ́ndaala