Ŋúnuyi 45 - Cebaara Bible 2010

Ŋúnuyi 45 Fànʔafɔw cèpɔrigɔ ŋúnugo

¹ Ŋúnuŋùúbèle kùndigi wóʔo, nyàáfyɛɛnri na. Kore jáabèle wóʔo. Tamana ŋúnugo. Tàmagi kéele ŋúnugo.

² Mii fúngi n nyìn syɛɛntaanri na, fwɔɔ ni ŋuu. Mii a mii ŋúnugi syɛ́ɛnrɛ joo fànʔafɔw í lóʔo! Mii nyínni i nyɛ àmɛɛ kɔvuuyo sɛ́bɛfɔlɔ sɛ́bɛkaanna nyɛ lè!

³ Mɔ wi nyɔɔ n sɔ̀lɔ syɔɔn piibèle myɛ na, kpɔ́ʔɔri n cariga mɔ nyɔɔwari na, a Kolocɔlɔɔ dùbaw wɔ́ɔ̀ kòro mɔ na làla o làla.

⁴ Kapɛɛnkpumɔn-sànbali, ki n yɛlɛ mi mɔ ŋɔséew pwɔɔ mi cáan mɔ lɛʔɛli ni, li lè mɔ darigali, ní mɔ kpɔ́ɔmi fɛ̀ɛ.

⁵ Mɔ sedegi pwɔɔ, mí ye mi lúgu mɔ wotorow na, nìjanri ni, maa fé mi sa fànʔa taa, kányɛɛgi, ní màámi, ní sínni báriga ni, mɔ kaliigi si kakpolo-kpèleye tɛ̀ɛn mɔ na.

⁶ Pe n mɔ ŋáayi fìrige, syɛɛnfeleyi a ra tuun mɔ láari ni. Yi a ra jǐn fànʔafɔw nigoolo zɔnbéle ni.

⁷ Ee Kolocɔlɔɔ, mɔ fangoli a kòro beè làla o làla kwɔ́ɔmɔ fun. Sínni kàgbeele li nyɛ mɔ fangi kàgbeele.

⁸ Sínni kéele n mɔ dɛ́nɛ, á péemi mɔ bɛɛn, gee bee na, Kolocɔlɔɔ, mɔ Kolocɔlɔw n fundaanra sìnmɛ wo mɔ na, n mɔ kpɔ́ʔɔ n sɔ̀lɔ mɔ pínɛnyɛnbèle na.

⁹ Míiri, ní alowɛsi, ní kasi nùndaanni i nyɛ mɔ búroyi myɛ na. Fànʔafɔ-gbaayi be faan ní sogǎngèle ní lè, kɔ̀ríbèle ŋúnuyo i fundaanra kaangi mɔ ma yi ni.

¹⁰ Fànʔafɔbéle cálipiigéle i nyɛ mɔ cenidaanmabèle ni. Fànʔafɔjaa i nyɛ mɔ kaliige ma, wee be fère ní Ofiiri tɛ́ɛ ní lè.

¹¹ Ki n yɛlɛ mi lóʔo, nɔ́ɔ̄, da wéle, mí mɔ líiyi sámaga mi cáan. Ki n yɛlɛ mi fɛ̀ʔɛ mɔ syɛ́ɛnbèle, ní mɔ tóow kpaʔa wòolo na.

¹² Mɔ nijanri kéele n tɔ̀nɔ n fànʔafɔw nyúngo cò. Amɛɛ wi nyɛ lè mɔ kafɔlɔ, ki n yɛlɛ maa wi kpɔ̀ʔɔrɔ́.

¹³ Tiiri cálipili a pye yaà ní li yakaanri ní li kɔ́gi ni. Bele be lè lɔ́ri fɔ̀ɔlɔ syɛ́ɛnbèle ni, poro a ra mɔ funjǎngi caa.

¹⁴ Fànʔafɔw calipile li nyɛ nìjanri myɛ fungomaw ni. Li búroyi i nyɛ a be yi súu ní tɛɛ̀ ní.

¹⁵ Pe n pan ní li ní fànʔafɔw ma, li kulɛɛrinɛʔɛbèle yalere si i nyɛ li na, pìcaabéle si i nyɛ li kurugo, pe lè li pínɛnyɛnbèle, pe n pan mɔ ma ní poro ní.

¹⁶ Pe i maa ní be ní fundaanra ní mugurumɔ nínge ni, pe i jǐn fànʔafɔ-gbaagi ni.

¹⁷ Mɔ piibèle a pye mɔ tóobèle sìndɛʔɛ ni, mɔ a be kpéʔele fànʔafɔbiigéle tári tɛ́ɛyɛ myɛ ni.

¹⁸ Mii a be yaʔa paa sɔ̀ngí da taagi mɔ mɛ́ɛgi na yìrigèle myɛ syɛ̀ɛnnɛ ni, syɛɛnfeleyi si wɔ́ɔ ra mɔ kpɔ̀ʔɔrɔ́ làrigèle myɛ ni kwɔ́ɔmɔ fun.