Ŋúnuyi 44 - Cebaara Bible 2010

Ŋúnuyi 44 Bi gi taa mɔ n wolo cée

¹ Ŋúnuŋùúbèle kùndigi wóʔo. Kore jáabèle wóʔo. Tamana ŋúnugo.

² Ee Kolocɔlɔɔ! Kérigèle mɔ kpéʔele lè wolo tóolɛɛbèle làla ni, booma cányi ni, wolo n gele bee lóʔo wolo líiweegèle ni, wolo tóolɛɛbèle pe ge joo n tɛ̀ɛn wolo na.

³ Mɔ n syɛɛnfeleye nɛnɛ n yirige yaà ní mɔ kɔ́gi ní, níì be télege. Mɔ n syɛɛnfeleye kálagi, níì be yaʔa be sínɛ sánʔa.

⁴ Pe n fànʔa taa tári bee na n di syɔɔ n taa, kàjáa gee bee ga pye pe ŋɔséebèle báriga ni í, pe kɔ́yi ban yi be syɔɔ í, fwɔɔ mɔ kaliigi, mɔ kɔ́gi, ní mɔ yɛ́ɛgi gbɛ̀ɛnmɛ, toro di be syɔɔ, níì cán pe kéeli n mɔ dɛ́nɛ.

⁵ Ee Kolocɔlɔɔ, mɔ wi nyɛ mii Fànʔafɔw, ki n yɛlɛ mi Zyakɔbi syɔɔli kéele joo mi gbàn!

⁶ Mɔ bárigaw ni wolo wolo nigoobèle círi ni cáan! Mɔ mɛ́ɛgi báriga ni wolo i wolo kàsiitun-nyɛ́nbèle tánʔana.

⁷ Níì cán mii o téē mii sɔ̀ngumi taari mii sedegi na í, mii ŋɔséew ban wi a mii syɔɔ í.

⁸ Kàjáa mɔ wi wolo syoo wolo kàsiitun-nyɛ́nbèle ma, ní i fɛ̀ɛrɛ wáa wolo parafɔbèle na.

⁹ Wolo i woyɛɛ gbɔ́ʔɔgi ní Kolocɔlɔɔ kéeli ní canʔa o canʔa, wolo a ra mɔ mɛ́ɛgi kpɔ̀ʔɔrɔ́ làla o làla. Ŋɔ́ndaala

¹⁰ A mɔ si wolo yirige n wáa bele, mɔ n fɛ̀ɛrɛ wáa wolo na, mɔ ní o yirigi ní wolo sùlasiibèle ní í.

¹¹ Mɔ i wolo lúrugu kàdoʔo ma kàsiitun-nyɛ́nw yɛ́ʔɛ ma, wolo parafɔbèle i wolo kɔ́lɔ yáriri koo.

¹² Mɔ n wolo kpéʔele àmɛɛ bàala nyɛ, bele be kúu ni káa lè, mɔ n wolo cariga syɛɛnfeleyi nínge ni.

¹³ Mɔ i mɔ syɛ́ɛnbèle pára tɔ̀nɔ fun ni, mɔ ga tɔ̀nɔ taa be párali ni í.

¹⁴ Mɔ n wolo kpéʔele yafaʔaga wolo tɛ́ɛnnyɛnbèle ma, wolo taana syɛ́ɛnbèle i peyɛɛ nyɛ́nɛ wolo na gbanʔama ní i wolo kpàná.

¹⁵ Mɔ n wolo kéeli kaan a li kòro syɛɛnfeleyi ma tanlɛʔɛ, ní yarigaa, syɛɛnfeleyi nínge ni, gee kéele na be nyúnyi kólo lè.

¹⁶ Mii cɛ́rɛli kéele i nyɛ mii yɛ́ʔɛ ma canʔa o canʔa, fɛ̀ɛ́ri n mii yɛ́ɛgi tɔ́n,

¹⁷ Wee yákpolo báriga ni wi fɛ̀ɛrɛ wáa syɔɔn na ní i wi faari lè, ní mii nigoow, ní mii gɔ̀lɔ́ wòlow nyaana báriga ni.

¹⁸ Gee bee myɛ i wolo taagi, bi gi taa wolo ga fɛ̀ʔɛ mɔ na í, wolo ga mɔ joogaanni kálagi í.

¹⁹ Wolo ga kolo n lúru wolo fúnyi ni í, wolo tɔ́lɔyi ga wàli n yiri mɔ kólogi ni í,

²⁰ á gi nyaa mɔ í wolo tɔ́nʔɔnɔ seʔe pɔ́nbèle tɛɛkòrogo ni, si kùúw nyínmɛ tɛ́ʔɛ bi wolo tɔ́n.

²¹ Kapye wolo maa fɛ̀ʔɛ wolo Kolocɔlɔw mɛ́ʔɛ na níì wolo kɔ́yi yìrige kolocɔlɔ-nibɔnwaa ma,

²² Kolocɔlɔɔ a dée gee bee cán ì, woro wee wi syɔɔn fúngi kalaragēle cán lè?

²³ Mɔ kéeli na pe wolo kúu canʔa o canʔa, pe i wolo córo àmɛɛ kaàkpoo-tɛ́ʔɛ bàala nyɛ lè.

²⁴ Ee Kàfɔw, ki n yɛlɛ mi yìri nya, nyàʔá na mɔ ŋúnɔ? Yìri nya ŋúnɔmi na! Mɔ a kɔ́ wolo wáa yaʔa gi kòro nya làla o làla í!

²⁵ Nyàʔá na mɔ mɔ yɛ́ɛgi làriga? Nyàʔá na mɔ fɛ̀ʔɛ wolo wɔʔɔgi ní wolo cɔ̀ɔnrimi kéele na?

²⁶ Níì cán wolo fúnyi n tìgi n too támiigi ni, wolo fícarigèle n tára tári na.

²⁷ Yìri mi wolo syɔɔ! Wolo nyúnyi syɔɔ mɔ funjǎngi báriga ni!