Ŋúnuyi 43 - Cebaara Bible 2010

Ŋúnuyi 43

¹ Ee Kolocɔlɔɔ, ki n yɛlɛ mi mii kútiiw ceri, pínɛ ní mii ní syɛɛnfelegi kánma na ki lè nyinimɛ fun! Mii syɔɔ námarafɔbèle ma, be lè syɛɛnnaa-sìnzinbèle!

² Mɔ wi nyɛ Kolocɔlɔɔ, wee wi nyɛ lè mii fǎngi, nyàʔá na mɔ mii wáa? Nyàʔá na mii yɛlɛ bàā táanri funbɛɛnrɛ na kagbanyi báriga ni mii nigoobèle taari mii na lè?

³ Mɔ gbɛɛnmi ní mɔ kányɛɛgi tórigo naa dee bee í ba mii yɛ́ɛgi kíni, bàā syée ní mii ní mɔ nyanbejǎngi, ní mɔ tɛɛkòroyi ma!

⁴ Lǎli bee ni mii a kári Kolocɔlɔɔ sáriga-wòlo-yafaangi ma Kolocɔlɔɔ ma, woro wee wi nyɛ lè mii fundaanri, ní mii mugurumi, mii a ra mɔ kpɔ̀ʔɔrɔ́ ní kɔ̀rí ní, ee Kolocɔlɔɔ, mii Kolocɔlɔw!

⁵ Ni fungo, nyàʔá na mɔ figiri? Nyàʔá na mɔ cɛ́ɛn mii kéeli na? Miyɛɛ daʔa Kolocɔlɔɔ na, níì cán mii a ní ba ra wi kpɔ̀ʔɔrɔ́, woro wi nyɛ mii Syɔɔfɔw ní mii Kolocɔlɔw.