Ŋúnuyi 42 - Cebaara Bible 2010

SƐBƐSIIN WOW Ŋúnuyi 42 Amɛɛ sɔ̀ɔ nyɛ wee wi ŋɔ́ngi ni fɔ̀ngi lè

¹ Ŋúnuŋùúbèle kùndigi wóʔo. Tamani ŋúnugo Kore jáabèle ŋùu lè.

² Kánmee na sɔ̀ɔ ŋɔ́ngi ni fɔ̀ngí lókoloyo lɔ̀ʔɔ kurugo lè, kánmi bee na mii ŋɔ́ngi ni fɔ̀ngí mɔ kurugo mii fúngi ni, ee Kolocɔlɔɔ!

³ Kolocɔlɔɔ kéeli i nyɛ mii fúngi ni àmɛɛ lògbaʔa nyɛ lè, Kolocɔlɔɔ woweew kéele, cangìí mii a kári bi sa yére Kolocɔlɔɔ yɛ́ʔɛ ma?

⁴ Mii nyatinmi bi nyɛ mii yaliiri canʔa ní yébilige, níì cán pe i gi nyuu mii ma làla o làla níì jo: «Sán mɔ Kolocɔlɔw nyɛ?»

⁵ Mii i sɔ̀ngí ni taagi kérigèle bee na, mii i mii fúngi kèlē nyuu ni láʔala, mii maa ni táanri ní syɛ́ɛnmi ní, ni syée ní bi ní Kolocɔlɔɔ kpáagi ma, fundaanri ní kpɔ̀ʔɔrɔli yákpowáara nínge ni, syɛɛnnɛʔɛmi fɛ́tii canbyeʔe na.

⁶ Ni fungo, nyàʔá na mɔ figiri? Nyàʔá na mɔ cɛ́ɛn mii kéeli na? Miyɛɛ daʔa Kolocɔlɔɔ na, níì cán mii a ní ba ra wi kpɔ̀ʔɔrɔ́, woro wi nyɛ mii Syɔɔfɔw ní mii Kolocɔlɔw.

⁷ Mii Kolocɔlɔw, mii fúngi báriga n tɔ̀nɔ n kwɔ́ɔ mii kéeli na, koro na mii sɔ̀ngí ni taagi mɔ na, n mii yaʔa Zyuridɛn tári ni, ní Hɛrimɔn nyanbe-nyundɔnɔyi, ní Miseyari nyanbelegi na.

⁸ Mɔ loyi tìngbɔɔmɔ báriga ni lòcurugaa i kàa yiri, mɔ loyi kùnguru-píigéle ní kùngurukpoloyi n mii tɔ́n.

⁹ Cángi làla ni Yawe a wi funjǎngi tɛ̀ɛn mii na, mii sáā ŋúu yébiligi myɛ ni wi ma, bàā Kolocɔlɔɔ nyɛ́ɛri, woro wee wi sìíw kaangi mii ma lè.

¹⁰ Mii a gi joo Kolocɔlɔɔ ma wi lè mii Fálagi, si jo: «Nyàʔá na mɔ fɛ̀ʔɛ mii na? Nyàʔá na mii yɛlɛ bàā táanri funbɛɛnrɛ na kagbanyi báriga ni mii nigoow taari mii na lè?»

¹¹ Mii kaceleyi n tɔ̀nɔ n tɔ́nʔɔnɔ mii kàsiitun-nyɛ́nbèle faʔara báriga ni, níì cán pe i gi nyuu mii ma làla o làla níì jo: «Sán mɔ Kolocɔlɔw nyɛ?»

¹² Ni fungo, nyàʔá na mɔ figiri, ní i cɛ́ɛn mii kéeli na? Miyɛɛ daʔa Kolocɔlɔɔ na níì cán mii a ní ba ra wi kpɔ̀ʔɔrɔ́, woro wi nyɛ mii Syɔɔfɔw ní mii Kolocɔlɔw.