Ŋúnuyi 41 - Cebaara Bible 2010

Ŋúnuyi 41 Wɔʔɔgɔfɔlɔ nyɛ́ɛrigɛ

¹ Ŋúnuŋùúbèle kùndigi wóʔo. Davidi ŋúnugi.

² Wee wi sɔ̀ngí ni taagi fànʔafunvɔw na lè, wee bee i nyɛ dùba pyà! Wɔʔɔgɔ canʔa ga nan, Yawe a wi syɔɔ.

³ Yawe a ra wi kpáaw wéle si wi yaʔa sìi na. Wi a dùbaw taa tári na. Mɔ a wi yaʔa wi nigoobèle ma wi pye be fungo í.

⁴ Wi ga ni yáa, Yawe n ni wi dɛ̀ɛmɛ́ wi yáami yasinɛgɛ na, mɔ i wi yasinɛgi sámagi wi yáami làla ni.

⁵ A mii jo: «Yawe, nyɔɔ mii na! Mii pǐli cólogo, níì cán mii n kapeele pye mɔ na.»

⁶ Mii nigoobèle i syɛɛnpeere nyuu mii kánmi na níì jo: «Làlìí ni wi a kùu bi yiri yaà, wi mɛ́ɛgi si kwɔ́ɔ.»

⁷ Wàa ga pan ba mii wéle, wi n ba ni jànvaa syɛ́ɛnri nyuu si sìnzinmi kèlē kpóʔoro bi yaʔa yaà wi fúngi ni. Wi ga yiri kàfugi na wi n ni koro nyuu.

⁸ Mii parafɔbèle myɛ i kabala ni nyuu ní peyɛɛ ní mii kánmi na. Pe i caa kapeʔe í mii taa.

⁹ Pe i gi nyuu níì jo: «Yaabeemɛ bi too wi na! Wi i wee wozinɛɔ ní, wi a ní yìri í!»

¹⁰ Alí mii tàannyɛngbɔɔw, woro wee na mii da tága lè, woro wee wi da ni mii yaliiri pínɛ ni líi ní mii ní lè, woro n baa kàri mii nigoo.

¹¹ Kàjáa mɔ, Yawe, nyɔɔ mii na mí mii yìrige! Mii si mii wógi sìndɛʔɛ taa bi wòlo be na.

¹² Gee ki gi tɛ̀ɛn mii na lè ncan mii kéeli n mɔ dɛ́nɛ, koro gi nyɛ mii nigoow ní o fàndaara yákpolo wáa mii kánmi na í.

¹³ Mɔ si n tɔ̀nɔ n mii tɔʔɔ n yérige mii sínvoroli ni, mɔ n mii tɛ́ʔɛ mii í kòro mɔ yɛ́ʔɛ ma làla o làla.

¹⁴ Yawe wi lè Isirayɛli Kolocɔlɔw, woro na kpɔ̀ʔɔrɔli yɛlɛ nlaa yaà bànzeli bàā syée yaà bàngwɔɔ. Amiina! Amiina!