Ŋúnuyi 40 - Cebaara Bible 2010

Ŋúnuyi 40 Ki n yɛlɛ pe myɛ í gi cán, gee mɔ kpéʔele mii ma lè

¹ Ŋúnuŋùúbèle kùndigi wóʔo. Davidi ŋúnugi.

² Mii n mii sɔ̀ngumi myɛ taʔa Yawe na, a wi jàari naa mii kàbangi na, wi n mii sùpili lóʔo.

³ Wi n mii kíle n yirige kálagili wéʔe ni, n mii yirige fárigi ni. Wi n mii tɔ́lɔyi taʔa fálaga na, n mii nyɔ̌ngèle sámaga n yérige.

⁴ Wi n ŋúnuvɔngɔ le mii nyɔ́ɔgi ni ki lè wolo Kolocɔlɔw sòololo ŋúnugaa. Syɛ̀ɛnnɛ saʔa a gee bee nyaa si fyáa, si be sɔ̀ngumi taʔa Yawe na.

⁵ Syɔ́ɔnwee wi wi sɔ̀ngumi taʔa Yawe na lè, wi si ga wàli n fala nɛ̀ɛnyɛnɛgi fɔ̀ɔlɔ, ní kólogi céefɔɔlɔ janvaa kurugo lè í, wee bee i nyɛ dùba pyà!

⁶ Ee Yawe, mii Kolocɔlɔw, kakpoloyi mɔ kpéʔele wolo ma lè, ní kérigèle mɔ tímana wolo nyɔɔmi kéele na lè, ke n nɛʔɛ, yafyɛn a gbǎn tímana ní mɔ ní í. Mii maa ni caa bi joo di kéeli na, bi di kéeli jáari, a di pye ti a gbǎn córo í.

⁷ Sáriga ní yakanʔa ban gi nyɛ mɔ yanidaanmagi í, mɔ n mii líiweegèle múgu. Mɔ ga sáriga-sórigoo ní kapeegèlē kùsulugo sáriga kéele joo í.

⁸ Lǎli bee ni a mii jo: «Wéle, mii i maa. Mii kéeli n sɛ́bɛ sɛ́bɛmigiw ni.

⁹ Mii Kolocɔlɔw, mɔ nyɛ́nɛ kéeli kpéʔelele n mii dɛ́nɛ! Mɔ lalwaw i nyɛ mii fúngi ni.»

¹⁰ Mii i sínni syɛɛnjóocànra nyuu syɛɛnnɛʔɛmi syɛɛnkpoʔolomɔ ni. Wéle, mii o mii nyɔ́ɔgi tɔ́ngi í, Yawe, mɔ n koro cán!

¹¹ Mii ga mɔ sínni kéele làriga mii fúngi ni í, mii i mɔ kányɛɛgi, ní syɔɔli syɛ́ɛnrɛ nyuu, lee mɔ kaangi lè, mii i mɔ funjǎngi, ní mɔ kányɛɛgi kéele jáari syɛɛnnɛʔɛmi syɛɛnkpoʔolomɔ ni.

¹² Mɔ Yawe, mɔ a kɔ́ mii kún mɔ nyínimi na í, ki n yɛlɛ mɔ funjǎngi ní mɔ kányɛɛgi í da mii kpáaw wéle làla o làla.

¹³ Níì cán bànjóro kapeeye n mii màʔa, mii sìnzinmi kèlē n mii nɛnɛ n cò, àlí mii ga níì gbàn ni nyaagi í. Ke n nɛʔɛ n sɔ̀lɔ mii ǹjoori kánma na, mii fǎngi n kwɔ́ɔ.

¹⁴ Ee Yawe, ki n yɛlɛ mi fɔ̀lɔ mi mii syɔɔ! Yawe, kɔlɔ̀ wári mi mii dɛ̀ɛmɛ!

¹⁵ Bele be mii sìikwɔɔri caa lè, ki n yɛlɛ fɛ̀ɛrɛ í pe myɛ pínɛ taa, pe yɛ́ɛyi í wɔ́ɔ be na! Bele be mii bɔ̀nɔw caa lè, ki n yɛlɛ pe lúru kàdoʔo ma bi curugo!

¹⁶ Bele be gi nyuu mii kéeli na lè: «Hèé! Hèê!» Ki n yɛlɛ yɛɛwɔɔ̀ í be taa be fɛ̀ɛ́ri kéele na.

¹⁷ Bele myɛ si be mɔ caa lè, ki n yɛlɛ bele bee í da fundaanra kpéʔele, sáā muguri mɔ kéeli na! Bele syɔɔli kéele dɛ́nɛ lè, lee mɔ kaangi lè, ki n yɛlɛ bele bee í da gi nyuu làla o làla si jo: «Yawe n yɛlɛ waa wi kpɔ́ʔɔgi!»

¹⁸ Mii si na, mii i nyɛ foomɔfɔlɔ ní fɔ̀ngɔfɔlɔ, kàjáa Yawe i sɔ̀ngí ni taagi mii na. Mɔ wi nyɛ mii dɛ̀ɛmɛfɔw ní mii Syɔɔfɔw, Ee mii Kolocɔlɔw, mɔ a kɔ́ sige mɔn í.