Ŋúnuyi 4 - Cebaara Bible 2010

Ŋúnuyi 4 Kolocɔlɔɔ ga fɔ̀lɔ kaŋàʔana-daʔayi na í

¹ Ŋúnuŋùúbèle kùndigi wóʔo, gee be ŋúu ní kɔ̀ríbèle ní lè. Davidi ŋúnugi.

² Kolocɔlɔɔ, mɔ wi lè mii sínni fɔ́lɔ, mii ga mɔ mɛ́ɛgi yeri lǎli ni lè, ki n yɛlɛ mi lóʔo mii ma! Lǎli ni mii pye fɔ̀rɔgi ni lè, mɔ n mii tɛ́ʔɛ ŋɔ́ndaala ni. Nyinimɛ taa mii na mí mii nyɛ́ɛrigi lóʔo!

³ Yele syɔɔn ye, làlìí ni yele a láʔa mii nìjanri faʔala na? Làlìí ni yele a láʔa gbanzan yáriri tàmaga, ní jànvaaw caala na? Ŋɔ́ndaala

⁴ Ki n yɛlɛ ye gi cán Yawe n tágala syɔ́ɔn nyɛ́nɛ n wòlo n yaʔa wiyɛɛ ma. Mii ga yákpoli wáa Yawe kurugo lǎli ni lè, wi n lóʔo mii ma.

⁵ Yaa figiri, ye si a kɔ́ kapeele pye í. Bi yele yaʔa yele yasinɛyi na yébiligi ni, yaa sɔ̀ngí yele fúnyi ni, yé pyèri. Ŋɔ́ndaala

⁶ Ki n yɛlɛ yaa sínnɛ sáriga wóo yé yeyɛɛ daʔa Yawe na.

⁷ Syɛ̀ɛnnɛ saʔa i gi nyuu níì jo: «Wìí syɔ́ɔn wi a wolo yaʔa wolo í kacànna taa?» Ee Yawe, ki n yɛlɛ mi mɔ yɛɛcɔɔli gbɛ̀ɛnmɛ yirige wolo ma!

⁸ Mɔ i fundaanra nii mii ni n sɔ̀lɔ pe yaliinɛʔɛri taala, ní be dùvɛɛnfɔnw nɛʔɛnɛ fundaanra na.

⁹ Mii ga sínɛ terire, mii i ŋúnɔ yɛɛ̀nyinge na, níì cán, ee Yawe, mɔ nibin wi mii kpáaw wéle mii tɛɛkòrogi ni.