Ŋúnuyi 39 - Cebaara Bible 2010

Ŋúnuyi 39 Mii yaʔa mii í làa ŋɔ́n daa, sìíw làla n tɔ̀nɔ n kpere

¹ Ŋúnuŋùúbèle kùndigi wóʔo Yedutun wógi. Davidi ŋúnugi.

² Mii maa gi joo níì jo: «Mii a ra mii kóloyi kɔ̀rɔsíi koro ga pye mii a kɔ́ kapeele kpéʔele ní mii nyínni ní í. Bi syɛɛnpeew yaʔa mii yɛ́ʔɛ ma, mii a cɔ̀ɔ tɛ́ʔɛ bi mii nyɔ́ɔgi pwɔɔ.»

³ Mii n kòro pyèrio, mii ga joo í. Mii maa mii nyɔ́ɔgi tɔ́n yarigaa joolo na, kàjáa kàa maa ni taari mii wɔʔɔgi na.

⁴ Mii zɔ̌nw maa ni sóori mii ni. N mii yaʔa cɛ́ɛnmi na, a naà cò mii ni, lǎli bee ni a mii kàri ni nyuu, níì jo:

⁵ «Ee Yawe, mii kwɔ́ɔganmi tɛ̀ɛn mii na, ní cányee kánma mii a kwɔ́ɔ sìi na lè. Mii a mii báriga-fǔnmi kéele cán.

⁶ Wéle, mɔ n mii sìíw canya pye kadatɛɛ̀ kánma, mii sìíw canya kánma o nyɛ yafyɛn mɔ nyɛ́nɛ na í. Kányɛʔɛ na syɔɔn o syɔɔn wi yìri lè, wi i nyɛ nyɔɔ káfalaga yagana.

⁷ Kányɛʔɛ na, syɔɔn i táanri ni máari àmɛɛ kànyinnɛ nyɛ lè, wi i fíigi ni máari, kàjáa wi i nyɛ nyɔɔ káfalaga! Wi i lɔnɛʔɛri caa ni kpóʔoro, wi si ga di lìifɔw cán í.

⁸ Tɔ́ɔliw ni, Ee Kàfɔw, nyàʔá mii ní i sige? Mɔ na mii mii sɔ̀ngumi taʔa.

⁹ Mii syɔɔ mii kolomi kèlē myɛ ma! Mɔ a kɔ́ mii yaʔa mii í pye nilabalaw ma yafaʔala í.

¹⁰ Mii n kòro pyèrio, mii o nyɔ́ɔgi múru í, níì cán mɔ wi koro kpéʔele.

¹¹ Mɔ kúruyi láʔa mii na nya! Mii n kálagi n kwɔ́ɔ kpúmɔnyi báriga ni mɔ kɔ́gi taʔa mii na lè.

¹² Mɔ i wɔʔɔlɔ téeri ni syɔɔn kóro wi kolomi kéele na, kánmee na fyɛnʔɛ yasanra líi ni kálagi lè, kánmi bee na mɔ wi fúngi yanidaanmaga kálagi. Kányɛʔɛ na syɔɔn o syɔɔn i nyɛ nyɔɔ káfalaga. Ŋɔ́ndaala

¹³ Yawe, ki n yɛlɛ mi mii nyɛ́ɛrigi lóʔo, mɔ líiyi cáan mi mii sùpili lóʔo! Ki ga yɛlɛ mɔ í líiweegèle tɔ́n mii nyɛnimi na í! Níì cán mii i nyɛ nibɔɔn mɔ tɛ́ɛgi ni, mii i nyɛ nibɔndɛ́ɛɔn àmɛɛ mii tóolɛɛbèle myɛ da pye lè.

¹⁴ Mɔ nyapili yirige nya mii ni mii yɛ́ɛgi a cèlege. Sáni mii í kári lè, mii a ní kɔ́ pye beè lè í!»