Ŋúnuyi 38 - Cebaara Bible 2010

Ŋúnuyi 38 Yaaɔ nyɛ́ɛrigɛ, wee wi wi kolomi kèlē cán lè

¹ Davidi ŋúnugi. Bi sɔ̀ngí taa.

² Ee Yawe, mɔ a kɔ́ mii wɔʔɔ mɔ fúngi làriyìrile ni í, mɔ a kɔ́ mii kpúmɔn mɔ fundanʔagbɔɔri làla ni í.

³ Níì cán mɔ ŋáayi n baa kóri mii na, mɔ kɔ́gi n mii kpúmɔn n cáan.

⁴ Tɛɛcànna faala o nyɛ mii céri na í, mɔ fundanʔagbɔɔri báriga ni, fànʔa faala o nyɛ mii kaceleyi ni í, mii kapeeli kéele na.

⁵ Mii kolomi kèlē n nɛʔɛ fwɔɔ n baa mii tɔ́n, ke i nyɛ tugogbɔɔrɔ, dee di líbe mii na lè.

⁶ Mii námiyi n lɔʔɔri n fìnimɛ le mii labalami kéele na.

⁷ Mii n lɛ̀ɛlɛ níì kùru niyɛɛ na fwɔɔ gbanʔama. Mii i nyaari ni cángi kwóo ní nyatinmɛ ní.

⁸ Níì cán mii sárigèle i sóori mii na àmɛɛ naà nyɛ lè, tɛɛcànna faala o nyɛ mii céri na í.

⁹ Mii i nyɛ fànʔa fun, níì tɔ̀nɔ n tɔ́nʔɔnɔ péw. Mii i cɛ́ɛn gbanʔama mii funjurugori kéele na.

¹⁰ Kàfɔw, mii yanidaanmari myɛ i yaà mɔ yɛ́ʔɛ ma, mii cɛ́ɛnmi ga làra mɔ na í.

¹¹ Mii zɔ̌nw i cɛ̀lɛ́, mii fǎngi n kwɔ́ɔ, àlí mii nyapiigèle gbɛ̀ɛnmɛ n kwɔ́ɔ.

¹² Mii tàannyɛnbèle ní mii pínɛnyɛnbèle ga fɔ̀lɔ n nùuni mii na í mii námigi kéele na, mii syɛ́ɛnbèle n canʔana n yére yaà léelige.

¹³ Bele be mii sìikwɔɔri caa lè, poro i be karinyanyi nii. Bele be mii wɔʔɔgi kéele caa lè, poro i syɛɛnpeeri nyuu, pe i tímana jànvaaw kéele na canbogi myɛ ni.

¹⁴ Mii si i nyɛ àmɛɛ dùnɔ̄ nyɛ lè, mii o lúro í. Mii i nyɛ àmɛɛ boboo nyɛ lè, mii o nyuu í.

¹⁵ Mii i nyɛ àmɛɛ syɔɔnwaa nyɛ wee wi lè wi o yafyɛn lúro í, ní wee wi lè syɛɛnlurugoro faala o nyɛ wi nyɔ́ɔgi na í.

¹⁶ Yawe, mɔ na mii mii sɔ̀ngumi taʔa, mɔ a lóʔo mii ma, Kàfɔw, mii Kolocɔlɔw!

¹⁷ Mii n jo: «Ki ga yɛlɛ paa fundaanra kpéʔele mii kéeli na í, mii tɔ́lɔgi ga fága lǎli ni lè, pe a kɔ́ ra kpɔɔmɔ kpéʔele mii kéeli na í!»

¹⁸ Níì cán mii n nan bi too, mii yáami si i nyɛ mii yɛ́ʔɛ ma làla o làla.

¹⁹ Kányɛʔɛ na, mii i mii kolomi nyuu ni tèé, mii kapeeli kéele i nyɛ mii na funjurugoro.

²⁰ Mii nigoobèle si n wéege, pe fǎngi n nɛʔɛ. Bele be mii para lè nyùngo fun, pe n nɛʔɛ.

²¹ Bele be mii kacǎnni sàrá ní kapeele ní lè, pe i nyɛ mii kurugo, bi gi taa kacǎnni mii caa.

²² Yawe, mɔ a kɔ́ mii yaʔa í! Mii Kolocɔlɔw, mɔ a kɔ́ léeli mii na í!

²³ Kàfɔw, mɔ wi lè mii syɔɔli, da maa mii ma kelekele mi ba mii dɛ̀ɛmɛ!