Ŋúnuyi 37 - Cebaara Bible 2010

Ŋúnuyi 37 Syɛɛnpeebèle taala a kɔ́ ra mɔ fúngi taanri í

1 Davidi ŋúnugi.

¹ Davidi ŋúnugi. Mɔ a kɔ́ mɔ fúngi yaʔa gi tanʔa kakolobyebèle kurugo í, kapeebyebèle nyabɛɛnnɛ ga yɛlɛ bi pye mɔ na í.

² Níì cán pe a ba fána kelekele àmɛɛ nyàā nyɛ lè, bi waʔa àmɛɛ nyàápirige nyɛ lè.

³ Mɔ sɔngumi taʔa Yawe na, máā kacàngēle kpéʔele. Tɛ́ɛn tári ni, máā líi kányɛɛgi na.

⁴ Da mɔ fundaanri kpéʔele Yawe kéeli na, koro ga pye yáriree mɔ nyɛ́ɛri mɔ fúngi ni lè, wi a ra di kaangi mɔ ma.

⁵ Mɔ kérigèle le Yawe kɔ́yi ni, mí miyɛɛ kàlifáa wi ma, wi a ra ge cɔɔnri.

⁶ Wi a mɔ sínni tɛ̀ɛn àmɛɛ gbɛ̀ɛ́nmi nyɛ lè, bi mɔ táangi tɛ̀ɛn àmɛɛ cânvulɛɛlɛ nyɛ lè.

⁷ Ki n yɛlɛ mi fúngi nyíngi Yawe yɛ́ʔɛ ma, máā wi sige ní kpàracogo ní. Syɔ́ɔnwee kèlē ge nyɔɔgi lè, mɔ a kɔ́ mɔ fúngi yaʔa kaa taanri wee bee kéele na í, wàlá bàā taanri wee kéele na wi kanbeemi tímana pí i forogi lè í.

⁸ Fundanʔari yaʔa, láʔa fundanʔagbɔɔri na. Mɔ a kɔ́ mɔ fúngi yaʔa kaa yìrigí í, gee bee a mɔ lége kapeebyere ni.

⁹ Níì cán kakolobyebèle a kwɔ́ɔ bi yiri yaà, bele si pe be sɔ̀ngumi taʔa Yawe na lè, bele bee a tári fáliga taa.

¹⁰ Ki n kòro cɛɛri syɛɛnpeew si a ní nyaa í! Mɔ a ba wi caa fɔ̀rɔ, wi a ní nyaa í!

¹¹ Màabyebèle si a tɛ́ɛn tári fáliga na, pe a ra fundaanra kpéʔele yɛɛ̀nyingbɔɔgi kéele na.

¹² Syɛɛnpeew i kanbeemɛ tímana syɛɛnsinw kánma na, wi i gǎngèle kúru wi kánmi na.

¹³ Kàfɔw i wi tɛ́ʔɛ níì cán wi n wi cángi nyaa ki i maa n kwɔ́ɔ.

¹⁴ Syɛɛnpeebèle i be ŋɔséebèle kɔ́nɔgi, ní wɔ́ɔ i be sedeyi kíle, koro ga pye poro í foomɔfɔw ní fɔ̀ngɔfɔw cáan tári na, poro í tɔ̀nɔ́ kôzingi fɔ̀ɔlɔ kpóo.

¹⁵ Pe ŋɔséebèle a jée pe tiimaa zɔ̌nbèle ni, pe sedeyi a kabagi.

¹⁶ Syɛɛnsiɔn cɛɛriw n pɔ́rɔ n sɔ̀lɔ syɛɛnpeebèle saʔa lɔnɛʔɛrɛ na.

¹⁷ Níì cán syɛɛnpeebèle kɔ́yɔ a kabagi, kàjáa Yawe n syɛɛnsinbèle tɔʔɔ n yérige.

¹⁸ Kolomɔ fun syɛ́ɛnbèle sìi canya kéele n kpɔ́ʔɔ Yawe ma, pe kɔ́rigi a kòro beè làla o làla.

¹⁹ Fɛ̀ɛrɛ a tée be taa cânbeegi na í, yafyɛn a be fɔ̀n kateegi làla ni í.

²⁰ Kàjáa syɛɛnpeebèle a kálagi, Yawe nigoobèle a pye àmɛɛ nyàápun-jànga nyɛ lè. Pe a kwɔ́ɔ, pe a tɔ̀nɔ́ kwɔ́ɔ wírige kwɔ́ɔganma na.

²¹ Syɛɛnpeew i fwɔ́ɔgèle kúunri, wi si o ge tɔ́ngi í, syɛɛnsinw si i nyinimɛ taagi ní i kaangi.

²² Bele na Yawe dùbaw taʔa lè, poro a tári kɔ́rigɔ lìi, bele si wi dánga lè, poro a kwɔ́ɔ yirige yaà.

²³ Yawe wi syɔɔn nyɔngèle tɛ́ʔɛganma nyɔɔgi, ní i fundaanra kpéʔele wi tánʔaganmi kéele na.

²⁴ Wi ga too, wi a kòro yaà tári na í, níì cán Yawe kɔ́gi i nyɛ wi láari ni.

²⁵ Mii maa pye pyà, mii si n kàri wolɛɛɔ. Kàjáa mii ga kɔ́ɔ̀ syɛɛnsiɔn nyaa a be wi yaʔa í, wàlá a wi pìíbèle i be yaliiri nyɛ́ɛri í.

²⁶ Canʔa o canʔa wi i nyínimɛ taagi ní i fwɔ́ɔgèle nii. Wi yòdaʔayi i nyɛ dùba pìibēle.

²⁷ Láʔa kapeegèle na, máā kacàngēle kpéʔele, mí kòro beè làla o làla.

²⁸ Níì cán gee gi sín lè, koro gi Yawe dɛ́nɛ, wi o wi tágala syɛ́ɛnbèle cèʔé í. Wi i be kpáaw wéle làla o làla, kàjáa syɛɛnpeebèle yòdaʔaya a kwɔ́ɔ yirige yaà.

²⁹ Syɛɛnsinbèle a tári fáliga taa, pe a tɛ́ɛn bi kòro di ni làla o làla.

³⁰ Syɛɛnsinw nyɔ́ɔ i nyuu ní sícilimɛ ní, wi nyínni i sínni kéele nyuu.

³¹ Wi Kolocɔlɔw làlwa i nyɛ wi zɔ̌nw na, wi nyɔ̌ngèle a tée yiri kólogi ni í.

³² Syɛɛnpeew i syɛɛnsinw kɔ̀rɔsíi, ní i wi kpóoganmi caa.

³³ Yawe si a wi yaʔa wi kɔ́yi ni í, wi a gi yaʔa be kútiiw joo cáan wi na wi kútiiw làrijoolo ni í.

³⁴ Ki n yɛlɛ maa Yawe sige, mí wi kólogi sámaga mi cò. Wi a mɔ kpɔ́ʔɔ si mɔ yaʔa mɔ í tári fáliga taa, mɔ si a syɛɛnpeebèle kálagitɔɔ nyaa.

³⁵ Mii n syɛɛnpeew nyaa wi séew myɛ ni, a wi cabara n pye àmɛɛ tiikpɔʔɔ nyɛ, gee gi fùn lè.

³⁶ Wi si n kwɔ́ɔ, wi ní o yaà í. Mii n wi caa, kàjáa wi a ní nyaa í.

³⁷ Da kolomɔ fun syɔ́ɔnw kɔ̀rɔsíi, da syɛɛnsinw wéle. Bɛ̀ɛlɛ légefɔlɔ nyɛ̀ʔɛnaw i nyɔɔgi.

³⁸ Kàjáa niceebèle a ba pínɛ kálagi, syɛɛnpeebèle kwɔ́ɔganma i nyɛ kálagila.

³⁹ Syɛɛnsinbèle syɔɔlɔ i yìrigí Yawe ma, woro wi nyɛ be tɛɛlàragi wɔʔɔli canʔa na.

⁴⁰ Yawe i be dɛ̀ɛmɛ́, ní i be kpáaw wéle. Wi i be yirigi syɛɛnpeebèle kɔ́yɔ ni, wi i be syoo, níì cán pe n peyɛɛ kàlifáa wi ma.