Ŋúnuyi 35 - Cebaara Bible 2010

Ŋúnuyi 35 Tɛɛlɛ fun syɔ́ɔnw be yeri kútiiw na lè, woro nyɛ́ɛrigbɔɔgi

1 Davidi ŋúnugi

¹ Davidi ŋúnugi Ee Yawe, da cáan ní bele ní be cáan ní mii ní lè, da túngu ní mii kàsiitun-nyɛ́nbèle ní!

² Tunmɔzige-yapili ní wogbɔɔgi láa mi yìri mi mii dɛ̀ɛmɛ!

³ Tàbaaw ní wɛ̀ɛ́li nyáʔana mii nɛnɛfɔbèle kánma na! Ki joo mii fúngi ma mí gi pye: «Mii wi nyɛ mɔ syɔɔli!»

⁴ Bele be mii sìikwɔɔri caa lè, ki n yɛlɛ fɛ̀ɛrɛ í be taa be curugo! Bele be kapeʔe tímana mii kánmi na lè, ki n yɛlɛ pe kacánmi í kwɔ́ɔ, be lúru kàdoʔo ma ní fyáara ní!

⁵ Ki n yɛlɛ be pye àmɛɛ fɔ̀migɔ nyɛ, gee káfalagi lée ni syée lè, ki n yɛlɛ Yawe nyɛ̀ʔɛni tunduɔn í be nɛnɛ!

⁶ Pe kólogi í pye yébilimɛ sáā tàrá, lǎli ni Yawe nyɛ̀ʔɛni tunduɔn ga be kɔ́ri n láa lè!

⁷ Níì cán pe n be cɔ̀ɔ́w cáan mii yɛ́ʔɛ ma nyùngo fun, ní wɔ́ɔ̀ weʔe túgu mii í too gi ni nyùngo fun.

⁸ Ki n yɛlɛ kálagila í ba be pàla, cɔ̀ɔ́wee be cáan lè, woro í be cò, pe too kálagili ni!

⁹ Lǎli bee ni mii fúngi a ra muguri Yawe ni, mii a ra fundaanra kpéʔele syɔɔli kéele na wi kaangi lè.

¹⁰ Mii kaceleyi myɛ a ra gi nyuu si jo: «Ee Yawe, wìí wi nyɛ mɔ félege? Mɔ wi foomɔfɔw syoo wi jáafɔw ma, ní wɔ́ɔ i fɔ̀rɔgɔfɔbèle, ní fɔ̀ngɔfɔbèle syoo bele ma pe be fuguri lè.»

¹¹ Jànvaa-séerafɔbèle i yìrigí, kérigèle ge lè mii ga ge cán í, pe i mii yíbe gele bee na.

¹² Pe i kapeele téeri ni mii kacǎnni fwɔ́ɔlɔ tɔ́ngi, mii fúngi n kòro ki nibin.

¹³ Lǎli ni si pe da pye lè pe ga cólogo í, mii maa gɔ̀nvaʔaga le burogo, mii maa ni mii fúngi wɔʔɔ ní súnleri ní, á mii nyɛ́ɛrigi kòro ni lúrugu ni maa mii ni.

¹⁴ Mii maa tɔ̀nɔ ni gi kpéʔele mɔ a jo mii tàannyɛnnɛ wàlá mii senyɛnnɛ wii, ni curugu ni máari. Mii maa ni lɛ̀ɛlɛ́ ní funbɛɛnrɛ ní àmɛɛ syɔɔn nyɛ wi nɔɔ̀ kùugo káyaʔa na lè.

¹⁵ Mii ga kpírige, pe n ni fundaanra kpéʔele si peyɛɛ gbóʔoro, bele be mii kpúmɔn lè pe n kpóʔoro mii kánmi na, n gi yaʔa mii ga kàa cán gi ni í, pe i mii sulugu sìnlaʔa ni.

¹⁶ Kolocɔlɔɔ yɛ́ʔɛnaa-sìnvyaabèle, ní nɛ̀ɛnyɛnɛgi fɔ̀ɔlɔ i be gǎngèle kúru mii kánmi na.

¹⁷ Ee Kàfɔw, kanmìí na mɔ gee bee nyaagi? Mii pǐli syɔɔ pe gàlagíw ma, mi mii sìíw syɔɔ càarabèle ma!

¹⁸ Mii a ra bariga kaangi mɔ ma syɛɛnnɛʔɛmi syɛɛnkpoʔolomɔ ni, mii a ra mɔ kpɔ̀ʔɔrɔ́ syɛɛnnɛʔɛmi nínge ni.

¹⁹ Bele be peyɛɛ bye lè mii nigoobèle nyùngo fun, pe a kɔ́ ra fundaanra kpéʔele mii kéeli na í, bele mii kéeli bɛɛn lè nyùngo fun ni, pe a kɔ́ ra mii teeri ní wélele ní í.

²⁰ Níì cán pe o nyuu yɛɛ̀nyingi kéele na í, fwɔɔ bele be nyɛ lè fûnnyinyi fɔ̀ɔlɔ tári ni lè, bele bee kánma na be námara kérigèle tímana.

²¹ Pe i be nyɔ́ɔyi múru mii kánmi na, ní i gi nyuu níì jo: «Hèé hèê! Wolo n nyaa ní wolo nyapiigèle ní.»

²² Yawe, mɔ n gi nyaa, mɔ a kɔ́ kòro nya pyèrio í! Kàfɔw, mɔ a kɔ́ léeli mii na í!

²³ Yìri ŋúnɔmi na mi mii kútiiw kéele cɔɔnri, mii táangi joo mii Kolocɔlɔw ní mii Kàfɔw!

²⁴ Ee Yawe, mii Kolocɔlɔw, mii kútiiw ceri mi yɛlɛ ní mɔ sínni ní, ki ga yɛlɛ pe kɔ́ ra fundaanra kpéʔele mii kéeli na í!

²⁵ Pe a kɔ́ ra gi nyuu be fúnyi ni mii kéeli na í si jo: «Cɔ́ɔ, koro si wolo da ni caa!» Pe a kɔ́ ra gi nyuu mii kéeli na í si jo: «Wolo n wi jɔ́ɔ!»

²⁶ Bele be fundaanra kpéʔele mii wɔʔɔgi kéele na lè, ki n yɛlɛ fɛ̀ɛ́ri í kòro be na! Fɛ̀ɛ́ri í be pínɛ taa gbanʔama. Bele be peyɛɛ gbɔ́ʔɔgi mii kánmi na lè, ki n yɛlɛ fɛ̀ɛ́ri, ní funjurugori í le be na burogo!

²⁷ Bele mii tàángi taala kéele dɛ́nɛ lè, poro sáā muguri sáā fundaangbɔɔrɔ kpéʔele, páā gi nyuu da taʔala si jo: «Yawe n yɛlɛ waa wi kpɔ̀ʔɔrɔ́, wi falipyew yɛɛ̀nyinge kéele n wi dɛ́nɛ!»

²⁸ Mii nyínni a ra mɔ sínni kéele nyuu, sáā mɔ sòoló canʔa o canʔa.