Ŋúnuyi 34 - Cebaara Bible 2010

Ŋúnuyi 34 Yawe n mii syɔɔ mii fyáari kèlē myɛ ma

¹ Davidi ŋúnugi. Lǎli ni wi da wiyɛɛ kàriga lè nicuroo Abimelɛki yɛ́ʔɛ ma, á wi wi nɛnɛ a wi kári.

² Mii a ra bariga kaangi Yawe ma làrigèle myɛ ni. Wi sòololi a tée fɔ̀n mii nyɔ́ɔgi na í.

³ Mii i fundaanra kpéʔele Yawe kéeli na! Ki n yɛlɛ màámi fɔ̀ɔlɔ í gi lóʔo, sáā fundaanra kpéʔele!

⁴ Ye pínɛ ní mii ní waa Yawe kpɔ́ʔɔri kéele nyuu! Wo pínɛ waa wi mɛ́ɛgi kpɔ́ʔɔgi!

⁵ Mii n Yawe caa, a wi lóʔo mii ma. Wi n mii syɔɔ mii fyáari kèlē myɛ ma.

⁶ Bele be wéle wi ma lè, pe yɛ́ɛyi i daragi fundaanri báriga ni, fɛ̀ɛrɛ a tée jée be yɛ́ɛyi ni í.

⁷ Foomɔfɔw n yákpoli wáa, a Yawe lóʔo wi ma, níì wi syɔɔ wi wɔʔɔyi kèlē myɛ ma.

⁸ Yawe nyɛ̀ʔɛni tunduɔn n tɛ́ɛn bele taana be fɛ̀ɛgí wi na lè n be màʔa ní i be syoo.

⁹ Ye gi tàánmi laala ye wéle bi gi cán kánmee na Yawe nyɔɔ lè! Syɔ́ɔnwee wi ga wiyɛɛ kàlifáa wi ma lè, wee bee i nyɛ dùba pyà!

¹⁰ Yaa fɛ̀ɛgí Yawe na, yele ye nyɛ lè wi syɛɛncanbèle! Níì cán Yawe yɛ́ɛgi fyáafɔɔlɔ a tée fɔ̀n yafyɛn ni í.

¹¹ Càarabiiyi fànʔa i kwóo, kateegi wɔ́ɔ i yi jáagi, kàjáa Yawe caafɔbèle a tée fɔ̀n kacànna faala ni í.

¹² Yaa maa, ni pìibēle, ye ba mii syɛ́ɛnri lóʔo! Mii a yele tama Yawe yɛ́ɛgi fyáara na.

¹³ Syɔɔnwìí sìíw kéele dɛ́nɛ, a mɔ i caa bi cannɛʔɛyɛ kwɔ́ɔ si pye yɛɛ̀nyinge na?

¹⁴ Da mɔ nyínni kɔ̀rɔsíi kapeeyi na, mí wɔ́ɔ maa mɔ nyɔ́ɔgi kɔ̀rɔsíi jànvaa syɛ́ɛnri joolo na.

¹⁵ Wàli mi lálʔa kapeebyeri na, máā kacǎngèle kpéʔele, da bɛ̀ɛ́li caa sìnlaʔa ni.

¹⁶ Yawe nyɛ́nɛ i nyɛ syɛɛnsinbèle na, wi i be sùpiigèle lúro.

¹⁷ Yawe i túngu ní bele ní be kapeeyi kpéʔele lè koro ga pye bi be kwɔ́ɔ yirige yaà tári ni, syɔɔn a ní kɔ́ sɔ̀ngí taa be kéeli na í.

¹⁸ Syɛɛnsinbèle ga ni sùpiigèle wáa, Yawe n lóʔo be ma, níì be syɔɔ n yirige be wɔʔɔyi myɛ ni.

¹⁹ Yawe n nùuni funnyɛniyi fɔ̀ɔlɔ na, bele fúnyo yi be yáa be kapeegèle kéele na lè, wi i be syoo.

²⁰ Kapeeye saʔa i syɛɛnsinw nii, kàjáa Yawe i wi syoo yee bee myɛ ma.

²¹ Wi i wi kaceleyi myɛ kɔ̀rɔsíi, kàa faala a tée kabi í.

²² Syɛɛnpeeo péemɛ pi a wi kpóo, bele be syɛɛnsinw para lè, kútiiw a too be na.

²³ Yawe i wi falipyebèle pìigēle syoo. Bele myɛ be peyɛɛ kàlifáa wi ma lè, kútiiw a tée too bele bee wàa faala na í.