Ŋúnuyi 33 - Cebaara Bible 2010

Ŋúnuyi 33 Kolocɔlɔw wi lè faanfɔw, ní Syɔɔfɔw, woro sòololi

¹ Yele syɛɛnsinbèle, yaa fundaanra yákpogéle wáa Yawe kpɔ̀ʔɔrɔli kéele na! Yele bele fúnyo yi fílige lè, yele na gi yɛlɛ yele í da wi sòoló.

² Yaa bariga kaangi Yawe ma ní kɔ̀ríw ní, yaa wi kpɔ̀ʔɔrɔli ŋúnuyo kpúmɔn mɛ́ɛngèle kɛɛ kɔ̀rí ni.

³ Yaa ŋúnuvɔngɔ ŋúu wi ma! Yaa kɔ̀nʔɔri sámagi yaa kpúmɔn, yáā ŋúu gbanʔama.

⁴ Níì cán Yawe syɛ́ɛnri n sín, wi kapyegèle myɛ si i kpéʔele kányɛɛgi na.

⁵ Sínni ní kányɛɛgi kèlē n wi dɛ́nɛ. Tári n nyìn Yawe funjǎngi na.

⁶ Nyɛ̀ʔɛgèle n sámaga Yawe syɛ́ɛnri báriga ni, ke ŋɔripiigèle myɛ n sámaga wi nyɔ́ɔgi káfalaga báriga ni.

⁷ Wi i sólomi lòyo kpóʔoro ni kpoʔolo yiyɛɛ na, wi n lòcuruyi kpóʔoro n yaʔa yi tɛ́ɛyi ni.

⁸ Ki n yɛlɛ tári myɛ í fyáa Yawe na! Ki n yɛlɛ dulunyanw syɛ̀ɛnnɛ myɛ í da cɛ̀lɛ́ wi yɛʔɛ̀ ma!

⁹ Níì cán wi n joo, a gi wɔ́ɔ̀ pye nya. Wi n joo n gbàn, a gi wɔ́ɔ̀ foro nya.

¹⁰ Yawe i tári syɛɛnfeleye kakɔrirɔgēle kálagi, wi i syɛɛnfeleyi katimanagéle kàragí gbanzan kèlē.

¹¹ Yawe kakɔrirɔli a kòro beè làla o làla, wi fúngi katimanagéle a wɔ́ɔ kòro beè làrigèle myɛ syɛ̀ɛnnɛ ma.

¹² Tári syɛɛnfelegee gi nyɛ lè a Yawe i nyɛ gi Kolocɔlɔw, dùba i nyɛ gi ma! Syɛ́ɛnbèle bele wi nyɛ́nɛ n wòlo lè n pye wi kɔ́rigi, pe i nyɛ dùba pìibēle!

¹³ N Yawe yaʔa nyɛ̀ʔɛni na wi n wi nyúngi jùngu ni wéle naa, wi i syɔɔn ye myɛw nyaagi.

¹⁴ N wi yaʔa yaà wi tɛɛkòrogi ni wi i tári syɛ̀ɛnnɛ myɛ wéle naa.

¹⁵ Woro wi pe myɛ fúnyo sámagi, woro wi be kapyegèle myɛ kɔ̀rɔsíi.

¹⁶ Fànʔafɔlɔ faala a gbǎn syɔɔ sùlasiinɛʔɛmɛ báriga ni í. Nànnirio a wɔ́ɔ gbǎn syɔɔ wiyɛɛ fànnɛʔɛgi báriga ni í.

¹⁷ Syɔnʔɔ a yafyɛn nyɔɔ syɔɔli kéele ni í, ki a tée gbǎn syɔɔn faala syɔɔ ní gi fànnɛʔɛgi ní í.

¹⁸ Wéle, bele be fɛ̀ɛgí Yawe na lè, wi nyɛnɛ i nyɛ bele bee na, poro bele be be sɔ̀ngumi taʔa wi funjǎngi na lè.

¹⁹ Koro ga pye wi be pìígèle syɔɔ kùu ma, sáā be gbóo kateegi làla ni.

²⁰ Wolo pìígèle i Yawe sige. Woro wi nyɛ wolo Syɔɔfɔw, ní wolo tunmɔzige-yárigi.

²¹ Wolo i muguri wolo fúnyi ni wi kéeli na, níì cán wolo n wo sɔ̀ngumi taʔa wi mɛ́ɛcǎngi na.

²² Ee Yawe, nyɔɔ wolo na àmɛɛ wolo wo sɔ̀ngumi taʔa mɔ na lè.