Ŋúnuyi 32 - Cebaara Bible 2010

Ŋúnuyi 32 Kùsuluzyɔɔri fundaanra kéele

1 Davidi ŋúnugi. Tamana ŋúnugo.

¹ Davidi ŋúnugi. Tamana ŋúnugo. Syɔ́ɔnwee kolomɔ bi láʔa wi na lè, wee kapeegéle kusulugo gi syɔɔ lè, wi i nyɛ dùba pyà.

² Syɔ́ɔnwee wi lè Yawe o wi kolomi córo í, ní wee wi lè jànvaa o nyɛ wi sɔ̀nguri ni í, wee bee i nyɛ dùba pyà.

³ N mii yaʔa pyèrio, mii kaceleyi maa ni sóori, mii maa ni cɛ́ɛn canbogi myɛ ni.

⁴ Níì cán mɔ kɔ́gi maa gbàn mii na gbanʔama canʔa ní yébilige, mii fǎngi maa kwɔ́ɔ, a mii pye àmɛɛ tiicɔ́rɔgɔ nyɛ, gee gbɛ̀ɛ́ngi làla káfugo waʔa lè. Ŋɔ́ndaala

⁵ Mii n mii kapeeli joo n tɛ̀ɛn mɔ na, mii ga mii kolomi làriga í. Mii n gi joo níì jo: «Mii a yére mii kolomi ni Yawe yɛ́ʔɛ ma!» A mɔ mii kapeeli kolomɔ kusulugo syɔɔ. Ŋɔ́ndaala

⁶ Kánmi bee na tágala syɛ́ɛnbèle myɛ a ra mɔ nyɛ́ɛri làrijǎnni ni! Lǎli ni lòkpoloyi ga nyìn lè, yi a tée nan be na í.

⁷ Mɔ i nyɛ mii ma tɛɛlàraga, mɔ i mii syoo wɔʔɔgi ma, mɔ i mii máari ní syɔɔli ŋúnuyo ní. Ŋɔ́ndaala

⁸ Mii a mɔ tama si kólogi tɛ̀ɛn mɔ na, gee mɔ yɛlɛ bi láa lè. Mii a ra mɔ yaragi, mii nyɛ́nɛ si pye mɔ na.

⁹ Mɔ a kɔ́ pye sícilimɛ fun àmɛɛ syɔnʔɔ, wàlá jòfanikàriga nyɛ lè í. Pe i yi yéregi ní kàrafeebèle, ní mɛ́ɛngèle ní, kapye koro ban í, yi a tée yére mɔ wóri ni í.

¹⁰ Wɔʔɔyɔ saʔa a syɛɛnpeew taa, wee si wi wiyɛɛ kàlifáa Yawe ma lè, wi funjǎngi n wee bee màʔa.

¹¹ Yele syɛɛnsinbèle, yaa fundaanra kpéʔele Yawe ni, yáā muguri! Yele bele myɛ fúnyo yi sín lè, yaa fundaanra yákpogéle wáa!