Ŋúnuyi 31 - Cebaara Bible 2010

Ŋúnuyi 31 Yawe, mɔ wi nyɛ mii tɛɛlàrali

¹ Ŋúnuŋùúbèle kùndigi wóʔo. Davidi ŋúnugi.

² Ee Yawe, mɔ láari ni mii fàn n làra, fɛ̀ɛrɛ ga yɛlɛ di mii taa nyáana í! Mii syɔɔ mɔ sínni báriga ni!

³ Mɔ líiyi cáan naa mii ma mí mii syɔɔ kelekele! Pye mii ma fálaga, gee ki a pye lè mii tɛɛlàragi, ní mii syɔɔli kènirige!

⁴ Níì cán mɔ wi nyɛ mii Fálagi ní mii Tɛɛnirigi, da kínigi mii yɛ́ɛgi na, da syée mii yɛ́ʔɛ ma mɔ mɛ́ɛgi kéele na.

⁵ Cɔ̀ɔ́wee be cáan mii yɛ́ʔɛ ma lè, mii yirige wi ni, níì cán mɔ wi nyɛ mii Tɛɛlàragi.

⁶ Mii n mii pǐli le mɔ kɔ́yi ni. Mɔ wi mii nyúngi syɔɔ, Yawe, mɔ wi lè kányɛɛgi Kolocɔlɔɔ!

⁷ Bele be gbanzan yáriyi kpɔ̀ʔɔrɔ́ lè, yi lè yasunyi, bele bee kéele n mii bɛɛn, kàjáa Yawe na mii mii sɔ̀ngumi taʔa.

⁸ Mii fundaanratɔw a ra muguri mɔ funjǎngi kéele na, níì cán mɔ n mii fóomi nyaa, mɔ n mii fúngi wɔʔɔgɔ kele cán.

⁹ Mɔ ga mii le nigoow kɔ́yɔ ni í. Mɔ n mii kaan a mii i táanri ni fuguri.

¹⁰ Ee Yawe, nyɔɔ mii na, níì cán mii i nyɛ wɔʔɔlɔ ni. Mii yɛ́ɛgi n wɔ́ɔ funjurugori báriga ni, mii pǐli ní mii céri fànʔa n kwɔ́ɔ.

¹¹ Mii sìíw fànʔa i kwóo ni syée wɔʔɔgi ni, a mii yɛ́ɛgèle i kwóo cɛ́ɛnmi ni. Mii kolomi i mii bárigaw kwóo, mii kaceleyi i kúu ni syée.

¹² Mii n baa pye yafaʔala mii tɛ́ɛnnyɛnbèle ma, mii kàsiitun-nyɛ́nbèle myɛ kéele na, fwɔɔ n baa sɔ̀lɔ, mii n pye fyáara yála mii cánvɔbèle ma. Bele be mii nyaagi kàfugi na lè, bele bee i fé ni léeli mii na.

¹³ Pe n fɛ̀ʔɛ mii na fúnyi ni àmɛɛ pe gáà fɛ̀ʔɛ kpóō kéele na lè, mii i nyɛ àmɛɛ kòdojaʔa nyɛ lè.

¹⁴ Mii i mii mɛ́ɛkalagi-syɛ́ɛnri lúro syɛ̀ɛnnɛ saʔa ma, fyáari n mii le nínge, pe ga peyɛɛ gbóʔoro mii kánmi na lǎli ni lè, pe n mii kpóoganmi tímana.

¹⁵ Kàjáa mɔ na mii mii sɔ̀ngumi taʔa, ee Yawe! Mii n jo mɔ wi nyɛ mii Kolocɔlɔw!

¹⁶ Mɔ kɔ́gi ni mii cányi nyɛ. Mii yirige mii nigoobèle kɔ́yɔ ni, ní mii wɔʔɔfɔbèle kɔ́yɔ ni!

¹⁷ Mɔ yɛ́ɛgi gbɛ̀ɛnmɛ yirige mɔ falipyew ma, mii syɔɔ mɔ funjǎngi báriga ni!

¹⁸ Ee Yawe, àmɛɛ mii mɔ mɛ́ɛgi yeri lè, fɛ̀ɛrɛ ga yɛlɛ di mii taa í. Fɛ̀ɛrɛ n yɛlɛ di syɛɛnpeebèle taa, pe jée kúbèle tɛɛkòrogo ni pyèrio!

¹⁹ Jànvaafɔbèle nyɔ́ɔyɔ í tɔ́n, poro bele be nɛ̀ɛnyɛnɛgi syɛ́ɛnrɛ nyuu lè syɛɛnsinw kánma na ní kpɔɔmɔ, ní faʔara ní!

²⁰ Mɔ funjǎngi mɔ kɔn bele yɛ́ʔɛ na be fɛ̀ɛgí mɔ na lè, ki n tɔ̀nɔ n kpɔ́ʔɔ, mɔ n gi sámaga bele ma be fàn n baa làra mɔ taana lè syɛ́ɛnbèle nyɛ́nɛ na!

²¹ Mɔ n be làriga mɔ yɛ́ɛgi láara ni syɛ́ɛnbèle jànvaa kèlē na, mɔ n be kɔn mɔ kpáagi ni n be syɔɔ nyíngèle ma ke be túngu lè.

²² Yawe n yɛlɛ waa wi kpɔ̀ʔɔrɔ́! Níì cán wi n wi funjǎngi tɛ̀ɛn mii kàbangi na, a gi pye àmɛɛ syɔɔn nyɛ kènirige ni lè.

²³ Mii si maa ni gi nyuu mii funjurugori báriga ni níì jo: «Pe n mii núngo mɔ yɛ́ʔɛ ma n tórigo léelige!» Kàjáa lǎli ni mii yákpoli wáa mɔ kurugo lè, a mɔ mii nyɛ́ɛrigboloyi lóʔo.

²⁴ Ye tàmaga le ní Yawe ní yele bele myɛ ye nyɛ lè wi syɛɛncanbèle! Yawe i tágala syɛ́ɛnbèle kpáa wéle, wee si wi wiyɛɛ gbɔ́ʔɔgi lè, wi i wee bee sàrá ní wɔʔɔgbanga ní.

²⁵ Yele bele myɛ ye yele sɔ̀ngumi taʔa Yawe na lè, ye nìrimɛ le yé zɔ̀nnirio taa!