Ŋúnuyi 30 - Cebaara Bible 2010

Ŋúnuyi 30 Yawe, mɔ n níì sìíw kaan mii ma

¹ Ŋúnugo. Ŋúnugi naa n pye kpɔ̀ʔɔrɔli kpaʔa kàlifaala kéele na. Davidi ŋúnugi.

² Ee Yawe, mii i mɔ kpɔ́ʔɔgi, níì cán mɔ n mii kíle n yirige, mɔ ga mii nigoobèle yaʔa pe i fundaanra kpéʔele mii kéeli na í.

³ Ee Yawe mii Kolocɔlɔw, mii n yákpoli wáa mɔ kurugo, a mɔ mii pɔʔɔ.

⁴ Ee Yawe, mɔ n mii pǐli kíle n yirige kúbèle tɛɛkòrogo ni, mɔ n mii yirige bele nínge ni be tíri weecurugi ni lè n níì yaʔa sìi na.

⁵ Yele bele ye nyɛ lè Yawe syɛɛncanbèle, yaa wi kpɔ̀ʔɔrɔli ŋúnugo ŋúu, yaa wi mɛ́ɛcǎngi kpɔ̀ʔɔrɔ́!

⁶ Níì cán wi fundanʔari i làla cɛɛri yagana kwóo, wi dɛ̀ɛmɛni si i nyɛ syɔɔn siiw canya myɛ ni. Nyatinmi ga pye yaà yébiligi ni, nyǐnjerigi na fundaanra n ba ni kpéʔele.

⁷ N mii yaʔa ŋɔ́ndaali ni, a mii i gi nyuu niyɛɛ ma níì jo: «Yafyɛn a tée mii cúngo nyáana í.»

⁸ Ee Yawe, mɔ dɛɛmɛni maa mii sámaga n yérige báriga nyanbelegi ǹjoʔo ni, a mɔ ga mɔ yɛ́ɛgi làriga, a mii fúngi curugo.

⁹ Ee Yawe, mii n yákpoli wáa mɔ kurugo, mii n Kàfɔw nyɛ́ɛri nyɛ́ɛrigbɔʔɔ na.

¹⁰ Mɔ ga mii sìsyaanw wo, wàlá n mii lége weecurugi ni, tɔ̀nɔwìí mɔ a taa gee bee ni? A támiigi a ra mɔ kpɔ̀ʔɔrɔ́ lé? Ba ki a ra mɔ kányɛɛgi kéele jáari lé?

¹¹ Lóʔo mii ma, Yawe, nyɔɔ mii na! Ee Yawe, mii syɔɔ.

¹² Mɔ n mii kùu káyaagi kàriga mugurumɔ, mɔ n gɔ̀nvaʔagi wòlo mii na níì fundaanri tɛ́ʔɛ n mii pwɔɔ,

¹³ koro ga pye mii fúngi í da mɔ kpɔʔɔrɔli ŋúnuyo ŋúu ki a kɔ́ pyèri í. Ee Yawe, mii Kolocɔlɔw, mii a ra mɔ kpɔ̀ʔɔrɔ́ làla o làla.