Ŋúnuyi 29 - Cebaara Bible 2010

Ŋúnuyi 29 Yawe yákpoli

1 Davidi ŋúnugi.

¹ Davidi ŋúnugi. Yaa kaangi Yawe ma, yele Kolocɔlɔɔ pìíbèle, yaa nìjanri ní séew kaangi Yawe ma!

² Yaa Yawe mɛ́ɛgi nìjanra kaangi wi ma! Yaa tíri yaa tuun Yawe yɛ́ʔɛ ma ní fèreri yacanvororo ní yeyɛɛ na!

³ Yawe yákpoli i lúro lǒyi ǹjoʔo ni, nìjangbɔɔri Kolocɔlɔɔ n nyɛ̀ʔɛni pye li i fologi ni kabagi. Yawe i nyɛ lòkpoloyi ǹjoʔo ni.

⁴ Yawe yákpoli i nyɛ ní séekpɔɔɔ ní, Yawe yákpoli i nyɛ ní fàngbɔʔɔ ní.

⁵ Yawe yákpoli i sɛdiri tíiyi kabagi. Yawe i Liban sɛdiri tíiyi kabagi,

⁶ wi n Liban kaan a wi i yegi àmɛɛ náapebiige nyɛ lè, ní Hɛrimɔn, àmɛɛ senɔ́ɔ náapebiige nyɛ lè.

⁷ Yawe yákpoli i naanyìnye yirigi.

⁸ Yawe yákpoli i fìími tára cúngu. Yawe i Kadɛsyi fìími tára cúngu.

⁹ Yawe yákpoli i sɔ̀ɔbèle yaari pe i sii, li i kɔliyi wára kɔlɔ. Pe myɛ i gi nyuu wi tɛɛkòrogi ni níì jo: «Nìjangbɔɔrɔ!»

¹⁰ Yawe maa pye yaà wodɛ́ɛɔn ní fǎngi na lòkpɔɔgi làla ni, Yawe i nyɛ wodɛ́ɛɔn ní fànʔafɔlɔ làrigèle myɛ ni.

¹¹ Yawe a sée kaan wi syɛ́ɛnbèle ma. Yawe a dùba kpéʔele wi syɛ́ɛnbèle ma, si yɛɛ̀nyinge kaan be ma.