Ŋúnuyi 28 - Cebaara Bible 2010

Ŋúnuyi 28 Syɔɔnwaa nyɛ́ɛrigɛ, wee wi kùúw nyaagi lè tɔ́ɔnrɔ

1 Davidi ŋúnugi.

¹ Davidi ŋúnugi. Ee Yawe, mɔ kurugo mii yákpoli wáa. Mii Fálagi, mɔ a kɔ́ mɔ líiweegèle tɔ́n mii na í! Mɔ ga pyèri mii na nya, mii a pye àmɛɛ bele nyɛ be tíri wéegi ni lè.

² Mii ga ni yákpoli wáa mɔ kurugo, níì mii kɔ́yi yìrige n wáa mɔ kpɔʔɔrɔli tɛɛcànga ma lǎli ni lè, ki n yɛlɛ mi mii nyɛ́ɛrigboloyi yákpolo lóʔo.

³ Mɔ a kɔ́ mii ní syɛɛnpeebèle, ní kakolobyebèle pínɛ bàā kíle da syée í. Poro bele be yɛɛ̀nyingi kéele nyuu be syɛɛnnyɛnbèle ma lè, bi gi taa be fúnyi n nyìn péemi na.

⁴ Pe sàra mi yɛlɛ ní be kapyegèle, ní be péemi kapyere ní, pe sàra mi yɛlɛ ní be kɔ́yi kapyele ní. Pe tiimaa kérigèle yaʔa ke lúru kòro be na.

⁵ Níì cán pe o sɔ̀ngí Yawe kapyegèle ní wi kɔ́yi fáli na í, ki n yɛlɛ wi be ŋɔrigɔ wi cáan, wi a ní kɔ́ be yìrige í!

⁶ Mii i bariga kaangi Yawe ma! Níì cán wi i mii nyɛ́ɛrigboloyi yákpolo lúro.

⁷ Yawe wi nyɛ mii fǎngi, ní mii tunmɔzige-yárigi, woro na mii niyɛɛ daʔa mii fúngi ni, a mii dɛ̀ɛmɛnɛ taa. Mii i muguri mii fúngi ni, mii a ra wi kpɔ̀ʔɔrɔ́ ní mii ŋúnuyi ní.

⁸ Yawe wi nyɛ wi syɛ́ɛnbèle fànʔa, wi mesiiw syɔɔlɔ kenirige.

⁹ Ki n yɛlɛ mi mɔ syɛ́ɛnbèle syɔɔ, dùba kpéʔele mɔ kɔ́rigi na! Pye be nàʔafɔw, mí be sámaga mi cò làrigèle myɛ ni.