Ŋúnuyi 27 - Cebaara Bible 2010

Ŋúnuyi 27 Mii n niyɛɛ nyaa yɛɛ̀nyinge na Yawe tɛ́ɛgi ni

1 Davidi ŋúnugi.

¹ Davidi ŋúnugi. Yawe wi nyɛ mii gbɛ̀ɛ́nmi, ní mii syɔɔli, wìí na mii a ní da fɛ̀ɛgí? Yawe wi nyɛ mii sìíw tɛɛlàraga, wìí na mii a ní fyáa?

² Lǎli ni kakolobyebèle nùuni mii na bi ba mii céri káa lè, poro bele be nyɛ lè mii kàsiitun-nyɛ́nbèle ní mii nigoobèle, a be i kpírigi ni tuun.

³ Kapɛɛnkpumɔnbéle ga tɛ́ɛn mii taana kapɛɛnni kánma na, fyáara a tée jée mii fúngi ni í. Alí kapɛɛnnɛ ga yìri mii kánmi na, koro ní ki myɛ ní mii sɔ̀ngumi a sèʔé tɛ́ɛn.

⁴ Mii i yariga nibin nyɛ́ɛri Yawe ma, koro gee mii caa lè ní lòmaana ní, koro gi nyɛ mii í tɛ́ɛn Yawe kpáagi ni mii sìíw canya myɛ ni, bàā Yawe nìjangbɔɔri sámagi da wéle, sáā wi kpɔ̀ʔɔrɔli kpaʔa kɔ̀rɔsíi.

⁵ Níì cán wi a mii làriga wi fànikpaagi ni, wɔʔɔgi canʔa na, wi a mii kɔn wi kpaafungi ni, wi a mii lúrugo yérige fálaga na.

⁶ Mii nyúngi i yìrigí n kwɔ́ɔ mii nigoobèle wóyo njoʔo ni, poro bele pe mii màʔa lè. Mii a ra sáriga wóo wi fànikpaagi ni wi lè fundaanra sáriga mii a ra ŋúu, mii a ra kɔ̀nʔɔri kpúmɔn Yawe kpɔ̀ʔɔrɔli kéele na.

⁷ Ee Yawe, mii yákpoli lóʔo, mii i mɔ yiri, nyɔɔ mii na, mí lóʔo mii ma!

⁸ Mii i sɔ̀ngí syɛ́ɛnri na, dee mɔ joo lè níì jo: «Yaa mii yɛ́ɛgi caa!» Yawe, mii i mɔ caa!

⁹ Mɔ a kɔ́ mɔ yɛ́ɛgi làriga mii na í, mɔ a kɔ́ mɔ falipyew nɛnɛ fundanʔara na í! Mɔ wi nyɛ mii dɛ̀ɛmɛfɔw, mɔ a kɔ́ mii yaʔa í, mɔ a kɔ́ mii cée í, mii syɔɔli Kolocɔlɔɔ!

¹⁰ Mii tóow ní mii nɔ́ɔw ga mii cée, Yawe a mii syɔɔ lége.

¹¹ Ee Yawe, da mii tama mɔ kólogi na, da syée ní mii ní kôzingi ni mii nigoobèle kéele na.

¹² Mɔ a kɔ́ mii yaʔa mii í pye mii kàsiitun-nyɛ́nbèle fúngo í, níì cán jànvaa séerafɔɔlɔ n yìri mii kánmi na, poro bele be lè syɛɛntanʔara o fɔ̀ngí be nyɔ́ɔyi na í.

¹³ Ɔnhɔ́ɔ̀n, koro na si mii kpéle níì tága gi na ncan mii a Yawe funjǎngi nyaa niweebèle tára ni!

¹⁴ Da wéle Yawe ma! Nìrimɛ le, mí zɔ̀nnirio taa! Da wéle Yawe ma!