Ŋúnuyi 26 - Cebaara Bible 2010

Ŋúnuyi 26 Tɛɛlɛ fun syɔ́ɔn i Yawe yiri

1 Davidi ŋúnugi.

¹ Davidi ŋúnugi. Mii kútiiw ceri, Yawe! Níì cán mii i táanri ni yɛlɛgi ní mii nyɔɔ-mí-foroli ní, mii n mii sɔ̀ngumi taʔa mɔ na, Yawe, mii o téē fíigi ni máari í.

² Ee Yawe, mii tímana mi wéle, mii sɛʔɛ mi wéle, mii fúngi, ní mii sɔ̀ngumi kèlē cɛɛlɛ.

³ Níì cán mɔ funjǎngi i nyɛ mii yɛ́ʔɛ ma, mii si i táanri mɔ kányɛɛgi na.

⁴ Mii o pìnɛ́ ni tɛ̀ɛ́n ní gbanzan syɛ̀ɛnnɛ ní tɛɛnijanga ni í, mii o jǐn ní námarafɔɔlɔ ní be pínɛnyɛnnɛgɛ ni í.

⁵ Kakolobyebèle syɛɛnkpoʔolomɔ kéele n mii bɛɛn, mii a pínɛ tɛ́ɛn ní syɛɛnpeebèle ní í.

⁶ Mii tɛɛlɛfunmɔtɔw i mii kɔ́yi jé, mii a ra mɔ sáriga-wòlo-yafaangi máari, ee Yawe!

⁷ Koro ga pye bàā bariga kaanna yákpolo wáa, sáā mɔ kakpoloyi myɛ kéele nyuu.

⁸ Yawe, mɔ kpáagi kòrolo kéele n mii dɛ́nɛ, gee ni mɔ nijangbɔɔri nyɛ lè.

⁹ Mɔ a kɔ́ mii pǐli pínɛ yirige ní kakolobyebèle wòʔolo ní í, mɔ a kɔ́ mii sìíw pínɛ kwɔ́ɔ ní syɛɛnkpoobèle ní í.

¹⁰ Poro bele kɔ́yɔ ni péemi nyɛ lè, pe kàliige kɔ́yi n nyìn lɔ́ri na, dee ní be syɛ́ɛnbèle nyúnyo kàragí lè.

¹¹ Mii si na, mii i síngi ni táanri. Nyɔɔ mii na, mí mii syɔɔ!

¹² Mii n mii tɔ́lɔgi taʔa tɛɛ̀yérejànga ni, mii a ra Yawe kpɔ̀ʔɔrɔ́ syɛɛnkpoʔolomi ni.