Ŋúnuyi 25 - Cebaara Bible 2010

Ŋúnuyi 25 Mɔ nyɛ́nɛ kéeli tɛ̀ɛn mii na, mí mii kolomi kùsulugo syɔɔ

1 Davidi ŋúnugi.

¹ Davidi ŋúnugi. Ee Yawe, mɔ má mii mii fúngi fíige.

² Ee mii Kolocɔlɔw, mɔ na mii mii sɔ̀ngumi taʔa, mɔ a kɔ́ fɛ̀ɛrɛ yaʔa di mii taa í! Mii nigoobèle ga yɛlɛ pe kɔ́ ra fàndaara yákpogéle wáa mii kéeli na í!

³ Syɛ́ɛnbèle bele myɛ pe be sɔ̀ngumi taʔa mɔ na lè, fɛ̀ɛrɛ a tée be taa í. Bele si be mɔ jànváa lè nyùngo fun, fɛ̀ɛrɛ a bele bee taa.

⁴ Ee Yawe, da mɔ kóloyi tèé mii na, da mii tama mɔ kóbiigèle na.

⁵ Da mii nii mɔ kányɛɛgi kólogo ni, máā mii tama, níì cán mɔ wi nyɛ Kolocɔlɔɔ, wee wi mii syoo lè, mɔ wi nyɛ mii sɔ̀ngumi tɛɛtaʔaga canʔa o canʔa.

⁶ Ee Yawe, sɔ̀ngi mi taa mɔ nyinidaari ní mɔ kpɔ́ʔɔri na, níì cán ti n téè pye yaà làla o làla.

⁷ Mɔ a kɔ́ ra sɔ̀ngí da taagi mii cárimi làla kapeegéle na í, wàlá mii céemi kèlē na í. Sɔ̀ngi mi taa mii na bi yɛlɛ ní mɔ funjǎngi ní, mɔ nyinidaari báriga ni, ee Yawe.

⁸ Yawe n nyɔɔ, wi n sín, koro na wi kólogi tèé kapeebyebèle na.

⁹ Wi i màámi fɔ̀ɔlɔ nii sínni kólogo ni, wi i màámi fɔ̀ɔlɔ tama woro kôdanʔari ni.

¹⁰ Yawe kóloyi myɛ i nyɛ funjànga, ní kányɛʔɛ bele má be wi joogaanni syɛ́ɛnrɛ, ní wi kajoogèle cò lè.

¹¹ Ee Yawe, mii sìnzinmi kùsulugo syɔɔ mɔ mɛ́ɛgi kéele na, níì cán pi n pee n baa sɔ̀lɔ.

¹² Syɔ́ɔnwee wi fɛ̀ɛgí Yawe na lè, kólogee wi yɛlɛ bi láa lè, Yawe n ni gi tèé wi na.

¹³ Wi fúngi a tɛ́ɛn ŋɔ́ndaala ni, wi yòdaʔayi si tári taa yi kɔrigɔ.

¹⁴ Bele be fɛ̀ɛgí Yawe na lè, wi fúngi kalarala i nyɛ bele bee wólo, wi a wi joogaanni tɛ̀ɛn bele bee na.

¹⁵ Mii nyapiigèle i nyɛ Yawe kàbangi na canʔa o canʔa, níì cán woro wi mii tɔ́lɔyi yirigi cɔ̀ɔ́w ni.

¹⁶ Wéle mii ma, mí nyɔɔ mii na, níì cán pe n mii yaʔa, mii i nyɛ nyinimɛ wóo ní.

¹⁷ Kàa n taʔa mii fúngi wɔʔɔyɔ na. Mii yirige nya mii funjurugori ni.

¹⁸ Ki n yɛlɛ mi mii yɛɛfuugi ní mii fɔ̀rɔgi wéle, mí mii kapeegèle myɛ kùsulugo syɔɔ.

¹⁹ Mii nigoobèle wéle kánmee na be nɛʔɛ lè, ní àmɛɛ be tɔ̀nɔ n mii para lè gbanʔama.

²⁰ Da mii sìíw kpáa wéle, mí mii syɔɔ! Fɛ̀ɛrɛ ga yɛlɛ di mii taa í, àmɛɛ mii mɔ kpéʔele lè mii tɛɛlàragi!

²¹ Ncan mɔ má mii wéle koro ga pye nyɔɔ-mí-foroli, ní sínni í da mii kpáaw wéle!

²² Ee Kolocɔlɔɔ! Isirayɛli syɔɔ wi wɔʔɔyi kèlē myɛ ma!