Ŋúnuyi 22 - Cebaara Bible 2010

Ŋúnuyi 22 Mii Kolocɔlɔw, mii Kolocɔlɔw, nyàʔá na mɔ mii yaʔa?

¹ Ŋúnuŋùúbèle kùndigi wóʔo. Nyǐnjerigi sɔ̀ɔ na. Davidi ŋúnugi.

² Mii Kolocɔlɔw, mii Kolocɔlɔw, nyàʔá na mɔ mii yaʔa? Nyàʔá na mɔ láʔa mii na, mɔ ga mii dɛ̀ɛmɛ í, mɔ ga mii cɛ́ɛnmi lóʔo í?

³ Ee mii Kolocɔlɔɔ, mii i yákpoli wáa cángi làla ni, mɔ o lúro mii ma í. Yébiligi ni mii wɔ́ɔ o mii nyɔ́ɔgi tɔ́ngi í.

⁴ Mɔ si wi nyɛ Wojanw, mɔ i nyɛ wodɛ́ɛɔn ní Isirayɛli ye kpɔ̀ʔɔrɔli nínge ni.

⁵ Mɔ na wolo tóolɛɛbèle da be sɔ̀ngumi taʔa, pe maa be sɔ̀ngumi taʔa mɔ na, a mɔ i be syoo.

⁶ Pe maa ni yákpogèle wáa mɔ kurugo, a be i syoo, pe maa be sɔ̀ngumi taʔa mɔ na, fɛ̀ɛrɛ ga be taa í.

⁷ Mii si na, fyɛnʔɛ mii nyɛ, syɔɔn ban í, mii i nyɛ yafaʔala syɔɔn ye ma, ní yanɔnʔɔgɔ syɛ́ɛnbèle ma.

⁸ Bele myɛ pe mii nyaagi lè, pe i peyɛɛ nyɛ́nɛ mii na, pe i nyɔɔfire sáan mii na, ní i nyǔnyi kólo mii kánmi na.

⁹ Ní i gi nyuu níì jo: «Wi n wi sɔ̀ngumi taʔa Yawe na, níì jo wi a woro syɔɔ! Wi si wi syɔɔ ì, níì cán wi kéeli n wi dɛ́nɛ!»

¹⁰ Mɔ si wi mii yirige mii nɔ́ɔw láʔa ni, mɔ wi mii sɔ̀ngumi taʔa mii nɔ́ɔw yíregéle na.

¹¹ Mii yiri lè mii nɔ́ɔw láʔa ni terire, mɔ má pe mii kaan nlaa mii nɔ́ɔw mii see lè, mɔ wi nyɛ mii Kolocɔlɔw.

¹² Mɔ a kɔ́ léeli mii na í, níì cán wɔʔɔgi n nùuni naa n kwɔ́ɔ, dɛ̀ɛmɛfɔlɔ faala si o mii na í.

¹³ Náapɛʔɛlɛ saʔa i mii máari, Basyan náape-nìriyi n mii le nínge.

¹⁴ Ke i ge nyɔ́ɔyi múru mii kánmi na àmɛɛ càaraɔ nyɛ, wee wi kaara sulugu lè ní i kaana.

¹⁵ Mii i nyɛ àmɛɛ lɔ̀ʔɔ nyɛ, gee gi ŋuu lè, mii kaceleyi myɛ n wɔ̀rɔ n yiri yiyɛɛ ni. Mii zɔ̌nw n kàri n pye àmɛɛ sékuro nyɛ lè, wi i nyangi mii fúngi ni.

¹⁶ Mii fǎngi n kwɔ́ɔ n waʔa àmɛɛ sísɛɛlɛ nyɛ lè, mii nyínni n tára mii gbǎdanw ǹjoʔo ma. Mɔ n mii tɛ́ʔɛ nyanweegi nyɔ́ɔ na.

¹⁷ Níì cán pɔ̀ɔnnɔ i mii máari, kapeeye pyefɔɔlɔ kabiga n mii le nínge, pe n mii kɔ́yi ní mii tɔ́lɔyi fùru.

¹⁸ Mii a gbǎn mii kaceleyi myɛ córo. Syɛ́ɛnbèle i mii wéle, pe n be nyapiigèle le n yaʔa mii ni.

¹⁹ Pe n mii yaleri lɛɛ peyɛɛ na, níì gɔ̌nw wáa mii búrobili kéele na.

²⁰ Ee Yawe, mɔ a kɔ́ léeli í, mɔ wee wi nyɛ lè mii fǎngi, da maa kelekele mi ba mii dɛ̀ɛmɛ!

²¹ Mii pǐli syɔɔ ŋɔséew ma, mi mii sìíw syɔɔ pɔ́nbèle fànʔa ma!

²² Mii syɔɔ càaraw nyɔ́ɔ ma, ní senɔ́ɔw nyɛ́ngéle ma! Ɔnhɔ́ɔ̀n, mɔ n lóʔo mii ma!

²³ Mii a ra mɔ mɛ́ɛgi jáari mii senyɛnbèle nínge ni, mii a ra mɔ kpɔ̀ʔɔrɔ́ syɛɛnkpoʔolomi nínge ni.

²⁴ Yele bele ye fɛ̀ɛgí Yawe na lè, yaa wi kpɔ̀ʔɔrɔ́! Yele Zyakɔbi yòdaʔayi myɛ, yaa wi kpɔ́ʔɔgi, yaa fɛ̀ɛgí wi na yele Isirayɛli yòdaʔayi myɛ!

²⁵ Níì cán wi ga syɛɛnfɔrɔw wɔʔɔyɔ faʔa wàlá n còʔoro wi na í, wi ga wi yɛ́ɛgi làriga wi na í, lǎli ni wi ga yákpoli wáa wi kurugo lè, wi n lóʔo wi ma.

²⁶ Mɔ bárigaw ni mii mɔ sòoló syɛɛnnɛʔɛmi nínge ni, mii a ra mii nyɔɔfaliyi forogi mɔ yɛ́ɛgi fyáafɔɔlɔ yɛ́ʔɛ ma.

²⁷ Màámi fɔ̀ɔlɔ a ra líi bàā tíngi, Yawe caafɔbèle a ra wi kpɔ̀ʔɔrɔ́, ki n yɛlɛ yele í pye sìi na làla o làla!

²⁸ Tári láʔagéle myɛ wòolo a sɔ̀ngí taa Yawe kéeli na, si lúru pan wi ma. Tári syɛɛnfeleye narigbaaya myɛ a ba ra tíri da tuun wi yɛʔɛ̀ ma.

²⁹ Níì cán fǎngi i nyɛ Yawe wóʔo, wi i nyɛ wodɛ́ɛɔn ní syɛɛnfeleyi nyúngo na.

³⁰ Tári séekpɔɔɔ fɔɔlɔ myɛ a ba ra líi, si wɔ́ɔ ra tíri da tuun. Syɛ́ɛnbèle bele be tíri ni jǐn támiigi ni lè, bele bee myɛ a ba ra kpùmɔnɔ́ wi yɛʔɛ̀ ma, bele be lè pe a gbǎn kòro sìi na peyɛɛ ma í.

³¹ Yòdaʔagi a ra báara wi ma. Pe a ra Kàfɔw kéele nyuu lǎlee syɛ̀ɛnnɛ ma be maa lè.

³² Pe a ba ra wi sínni kéele nyuu syɛ́ɛnbèle bele ma pe a kɔ́ ba yiri lè si jo: «Yawe wi gi pye.»