Ŋúnuyi 21 - Cebaara Bible 2010

Ŋúnuyi 21 Yawe na fànʔafɔw yɛlɛ bi wi sɔ̀ngumi taʔa

¹ Ŋúnuŋùúbèle kùndigi wóʔo. Davidi ŋúnugi.

² Ee Yawe, fànʔafɔw i fundaanra kpéʔele mɔ séekpɔɔw kéele na, wi n tɔ̀nɔ n nyìn fundaanri na syɔɔli kéele na mɔ kaan lè!

³ Yárigee kéele li pye wi fúngi ni lè, mɔ n gi kaan wi ma, gee wi da ni nyɛ́ɛri wi nyɔ́ɔgi ni lè, mɔ ga cée wi ma gi na í. Ŋɔ́ndaala

⁴ Mɔ n wi fàra ní dùba kataangēle ní, mɔ n tɛɛteleo fànʔafɔ-nyùndɔnnɔ tɔ́n wi nyúngi na.

⁵ Sìíw wi nyɛ́ɛri mɔ ma lè, mɔ n wi kaan wi ma, wi lè cannɛʔɛyɛ bi kòro beè làla o làla kwɔ́ɔmɔ fun.

⁶ Wi nìjanri n kpɔ́ʔɔ syɔɔli báriga ni mɔ kaan lè. Mɔ i gbɛ̀ɛ́nmi, ní kpɔ́ɔmi taari wi na.

⁷ Mɔ n wi kpéʔele dùba pyà làrigèle myɛ ni, mɔ i wi nyìngí fundaanri na miyɛɛ yɛ́ʔɛ ma.

⁸ Fànʔafɔw n wi sɔ̀ngumi taʔa Yawe na. Wee wi nyɛ lè Pe Myɛ Nyúngo na woro funjǎngi báriga ni, yafyɛn a tée fànʔafɔw cúngo í.

⁹ Mɔ kɔ́gi a mɔ nigoobèle myɛ taa cò, mɔ kaliigi a mɔ parafɔbèle taa cò.

¹⁰ Mɔ ga baa miyɛɛ dɛ̀ɛn cángee na lè, mɔ a be kàriga àmɛɛ fúru naagbanga nyɛ lè. Yawe a be jɔ́ɔ wi fundanʔari báriga ni, náagi a be kwɔ́ɔ.

¹¹ Mɔ a be yòdaʔayi, ní be syɛɛnfelegi kpóo yirige tári ni, syɛ́ɛnbèle nínge ni.

¹² Pe n kapeʔe tímana mɔ kánmi na, pe n kanbeemaa tímana, pe fǎngi si a ba kwɔ́ɔ.

¹³ Níì cán mɔ a be kɔ́ri be kàdoʔo kaan, mɔ si be ŋɔɔn ní mɔ sedegi ní.

¹⁴ Ee Yawe, yìri mi mɔ fangi tɛ̀ɛn, wolo sáā ŋúu sáā mɔ sòoló mɔ séekpɔɔw kéele na.