Ŋúnuyi 20 - Cebaara Bible 2010

Ŋúnuyi 20 Nyɛ́ɛrigɛ, fànʔafɔw kéele na

¹ Ŋúnuŋùúbèle kùndigi wóʔo. Davidi ŋúnugi.

² Ki n yɛlɛ Yawe í mɔ nyɛ́ɛrigi lóʔo fɔ̀rɔgi canʔa na, ki n yɛlɛ Zyakɔbi Kolocɔlɔw mɛ́ʔɛ í da mɔ kpáaw wéle!

³ Ki n yɛlɛ wi dɛ̀ɛmɛnɛ yìrige tɛɛcǎngi ma bi tórigo naa mɔ ma, wi mɔ sámaga cò ní fànʔa ní, gee ki a yìri Siyɔn ma lè.

⁴ Ki n yɛlɛ wi sɔ̀ngi wi taa mɔ yakaanyi myɛ na, si fɔ̀lɔ mɔ sáriga-sórigow na! Ŋɔ́ndaala

⁵ Yárigee kéele li nyɛ mɔ fúngi ni lè, ki n yɛlɛ wi gi kaan mɔ ma, sáā mɔ kakɔrirɔgèle myɛ forogi!

⁶ Wolo a ra fundaanra yákpogéle wáa syɔɔli kéele na mɔ kaan lè, si dìrapow yìrige wolo Kolocɔlɔw mɛ́ʔɛ kéele na. Ki n yɛlɛ Yawe í mɔ nyɛ́ɛriyi kèlē myɛ foro.

⁷ Tɔ́ɔliw ni mii n náà gi cán Yawe i wi wonyɛnɛ-wòlow syoo, bi wi yaʔa wi nyɛ̀ʔɛni kpɔ̀ʔɔrɔlɔ kpaacanga ni, wi a wi nyɛ́ɛrigi lóʔo, si wi kàliigi tɛ́ʔɛ bi wi dɛ̀ɛmɛ.

⁸ Syɛ́ɛnbèle pèle n be sɔ̀ngumi taʔa be wòtorobèle na, á pèle be sɔ̀ngumi taʔa be syɔ́ɔnyi na, wolo si na, Yawe wolo Kolocɔlɔw mɛ́ʔɛ wolo yiri.

⁹ Bele bee na, pe i kùrú ní i tuun, kàjáa wolo na, wolo n yìri n yére, níì sámaga n yére.

¹⁰ Ee Yawe, fànʔafɔw syɔɔ. Wolo ga ni mɔ mɛ́ɛgi yiri lǎlee ni lè, mi lóʔo wolo ma!