Ŋúnuyi 19 - Cebaara Bible 2010

Ŋúnuyi 19 Kolocɔlɔɔ nìjangbɔɔri dulunyanw ni, Yawe làlwaw

¹ Ŋúnuŋùúbèle kùndigi wóʔo. Davidi ŋúnugi.

² Nyɛ̀ʔɛgèle i Kolocɔlɔɔ nìjangbɔɔri jáari, ǹjoʔomaw i wi kɔ́yi fáli tèé.

³ Cangaa i syɛɛnrɛ fíligi kàa ma, a yébiligaa i cánna kaangi kàa ma.

⁴ Syɛɛnjóoro fun ni, syɛɛnkanya fun ni, ti joomɔ ga lóʔo í.

⁵ Ti tamani si n yiri n nan tári tɛ́ɛyɛ myɛ na, ti syɛ́ɛnri n nan dulunyanw láʔagéle na, Kolocɔlɔɔ n fànikpaʔa pye nyɛ̀ʔɛni na cángi ma.

⁶ Cángi i yirigi nyǐngi nyɔ́ɔ na àmɛɛ cefɔɔn fɔ́lɔ nyɛ, wee wi yirigi wi tɛɛ̀sinɛgi ni lè, ki fundaanri wɔ́ɔ i nyɛ àmɛɛ kàfyaafan-sànbali wóro nyɛ, wee wi fànʔa taa kàfyaali na lè.

⁷ Ki i yirigi nyɛ̀ʔɛni láʔalee ma ni syée n sa ni tuun láʔalee ma, yarigaa faala o làrá gi káfugi na í.

⁸ Yawe làlwaw n nyɔɔ n foro, wi i syɔɔn fúngi télegi. Yawe séeraw i nyɛ kányɛʔɛ, wi i kanaa-sìnjáɔn cìligí.

⁹ Yawe kajoogèle n sín, ke i fundaanra kaangi syɔɔn ma. Yawe tundunri n fílige, ti i gbɛ̀ɛnmɛ yirigi syɔɔn ma.

¹⁰ Yawe yɛ́ɛgi fyáara i nyɛ fɔɔnrɔ fun, ti a kòro beè làla o làla. Yawe kajoogèle i nyɛ kányɛʔɛ, ke myɛ n sín.

¹¹ Ke n nyɔɔ n sɔ̀lɔ tɛɛ̀ na, àlí tɛɛtelew wonɛʔɛɔ na. Ke n tɛ́nɛ n sɔ̀lɔ sárigā na, àlí sélogi na gi sɔlɔ ni yirigi ségbabiga ni lè.

¹² Koro ge wɔ́ɔ̄ mɔ falipyew sàmí, tɔ̀nɔkpɔɔɔ i nyɛ ge cǒli ni syɔɔn ma.

¹³ Syɔɔnwìí wi a gbǎn wiyɛɛ tɛɛtoogèle cán? Kapeegèle mii kpéʔele ke sìnján ni lè, ge kùsulugi syɔɔ mii ma.

¹⁴ Mi wɔ́ɔ mɔ falipyew syɔɔ niyɛɛ dɔriri kapeegéle ma, jàngó ke a kɔ́ tɛ́ɛn mii nyúngi na í! Lǎli bee ni mii a pye syɛɛnsinvoroo, si pye tɛɛlɛ fun kapeekpɔʔɔ kàbaan na.

¹⁵ Fɔ̀lɔ mii nyɔ́ɔgi syɛ́ɛnrɛ na, ní gee na mii sɔ̀ngí mii fúngi ni mɔ yɛ́ʔɛ ma lè. Ee Yawe, mɔ wi lè mii Fálagi ní mii Nyùnzyɔɔw!