Ŋúnuyi 18 - Cebaara Bible 2010

Ŋúnuyi 18 Fànʔafɔw i bariga kaangi Kolocɔlɔɔ ma wi fàndaari kàdoʔo ma

¹ Ŋúnuŋùúbèle kùndigi wóʔo. Yawe falipyew Davidi ŋúnugi. Lǎli ni Yawe wi syɔɔ wi nigoobèle myɛ ma lè ní wɔ́ɔ̀ wi syɔɔ Sawuli ma, a wi syɛ́ɛnri naa ŋùu Yawe ma ŋúnugo, níì jo:

² «Ee Yawe, mɔ wi lè mii fǎngi, mɔ kéeli n mii dɛ́nɛ.»

³ Yawe wi nyɛ mii Fálagi, ní mii Tɛɛnirigi, ní mii Syɔɔfɔw! Mii Kolocɔlɔw wi nyɛ mii fálaweegi, beè mii làrá lè! Ní mii tunmɔzige-yárigi, ní fǎngee gi mii syoo lè, ní mii kpaataʔa-tɔ́nɔgi!

⁴ Mii i yákpoli wáa ni gi nyuu níì jo: «Yawe n yɛlɛ waa wi kpɔ̀ʔɔrɔ́!» A mii syɔɔ mii nigoobèle ma.

⁵ Kùúw mɛ́ɛngéle maa mii mígele, kálagili lòcooloyo maa fyáakpɔɔrɔ cáan mii na.

⁶ Kúbèle tɛɛkòrogo mɛ́ɛngéle maa mii màʔa, kùúw cɔ̀ɔbēle maa pye wolebéle ní mii yɛ́ʔɛ ma.

⁷ N mii yaʔa mii fɔ̀rɔgi nínge ni, a mii Yawe mɛ́ɛgi yeri, mii n yákpoli wáa mii Kolocɔlɔw kurugo. N wi yaʔa wi kpɔ̀ʔɔrɔli kpaʔa ni, a wi mii yákpoli lóʔo. A mii sùpili sáà jée wi líiweegèle ni.

⁸ Lǎli bee ni a tári i cúngu ní i cɛ̀lɛ́, a nyanbeleyi kàpɔɔnbēle i seri, pe maa ni cúngu níì cán wi fúngi maa tanʔa gbanʔama.

⁹ Wírige maa ni yirigi wi fínaagèle ni ni lúru ǹjogi ni, naà si i yirigi wi nyɔ́ɔgi ni gee gi sórigoli kpéʔele lè. Naàniganw si wɔ́ɔ i yirigi yaà.

¹⁰ Wi n nyɛ̀ʔɛgèle tìrige táàma, níì tìgi n pan, fàfaanwɔʔɔ si i nyɛ wi tɔ́lɔyi láara ni.

¹¹ Wi n lúgu syerubɛnwaa na n yìri ǹjogi ni, wi i yaagi káfalaga fókaanya na ǹjogi ni.

¹² Wi n yébiliwɔɔlɔ tɛ́ʔɛ n wiyɛɛ màʔa, a loro pye wi fànikpaagi, á lònɛʔɛgɛ, ní nyɛ̀ʔɛwɔɔlɔ fafaanya wi tɔ́n.

¹³ Gbɛ̀ɛndelemɛ maa kíni wi yɛ́ɛgi na, bee ni fàfaanya, ní zěsolomɔ, ní naànigaɔn yirigi lè.

¹⁴ N Yawe yaʔa nyɛ̀ʔɛni na, a wi folo n kabagi, wee wi nyɛ lè Pe Myɛ Nyúngo na, wi n wi yákpoli wáa ní zěsolomi, ní naàniganw ní.

¹⁵ Wi n wi ŋáayi ŋɔɔn n be cariga, wi n nyɛ̀ʔɛni sàli n tɛ́ʔɛ n be nɛnɛ.

¹⁶ Amɛɛ mɔ kaana lè Yawe, ní mɔ fundanʔaratɔw káfalaga mɔ ŋɔ́n lè, a lòkpɔɔgi nɔ́ʔɔ̄ nyaa, a tári kàpɔɔnbēle yiri kàfugi na.

¹⁷ Wi n wi kɔ́gi sánʔa yaà ǹjogi ni n baa mii cò, wi i mii kíle ni yirigi lòkpɔɔ-cùrugi ni.

¹⁸ Wi i mii syoo mii fànnɛʔɛgɛ nigoow ma, ní bele má bele mii kéeli bɛɛn lè, poro bele fànʔa gi nɛʔɛ n sɔ̀lɔ mii wógi na lè.

¹⁹ Pe maa too mii na mii wɔʔɔgi canʔa na. Kàjáa a mii télege Yawe na.

²⁰ Wi n mii yirige yaà beè n lége ŋɔ́ndaali ni, wi n mii syɔɔ, níì cán mii kéeli n wi dɛ́nɛ.

²¹ Yawe n mii cò n yɛlɛ ní mii sínni ní. Wi n mii sàra n yɛlɛ ní gi ní àmɛɛ mii kɔ́yi nyɛ lè fɔɔnrɔ fun.

²² Níì cán mii n Yawe kólogi kèlē sámaga n cò. Mii ga téè peemɛ kpéʔele n wàli n láʔa mii Kolocɔlɔw na í.

²³ Mii n wi kajoogèle myɛ kínige niyɛɛ yɛ́ʔɛ ma, mii ga téè wàli n láʔa wi làlwaw kèlē na í.

²⁴ Mii maa pye tɛɛkololo fun wi ma, mii maa ni niyɛɛ kɔ̀rɔsíi jàngó mii a kɔ́ too tɛɛlaa ni í.

²⁵ A Yawe si wɔ́ɔ̀ mii sàra n yɛlɛ ní mii sínni ní, n yɛlɛ ní gi ní àmɛɛ mii kɔ́yi nyɛ lè fɔɔnrɔ fun wi yɛʔɛ̀ ma.

²⁶ Wee wi fíligi lè, mɔ i fíligi wee bee ma, syɔ́ɔnwee wi nyɛ lè tɛɛlɛ fun, mɔ n miyɛɛ dɛ̀ɛn tɛɛlɛ fun wee bee na.

²⁷ Wee wi nyɛ lè fɔɔnrɔ fun, mɔ n miyɛɛ dɛ̀ɛn fɔɔnrɔ fun wee bee na, wee si wi nyɛ lè nikalagiga, mɔ n wee bee cò n yɛlɛ ní wi kálagimi ní.

²⁸ Níì cán syɛ́ɛnbèle bele be màámi kpéʔele lè mɔ wi bele bee syoo. Bele si be peyɛɛ gbɔ́ʔɔgi lè, ní i poro nyúnyi jùngú.

²⁹ Mɔ wi nyɛ mii fètinni gbɛ̀ɛnmɛ. Yawe, mii Kolocɔlɔw i gbɛ̀ɛ́nmi yirigi mii ma ni mii yébilimi nɛnɛ.

³⁰ Mɔ bárigaw ni mii tìngí ni tɔ́ngi kapɛɛnkpumɔnbéle kabiga na, mii Kolocɔlɔw báriga ni mii gbàn ni tò kána.

³¹ Kolocɔlɔɔ kólogi kèlē n tɔ̀nɔ n sín n foro, Yawe syɛ́ɛnri i nyɛ wozɛʔɛgwɔɔrɔ ní. Bele myɛ be làra wi ni lè, wi i nyɛ bele bee má tunmɔzige-yariga.

³² Koro na wìí wi nyɛ Kolocɔlɔɔ, kapye Yawe ban í? Ba wìí wi nyɛ Fálagi, wolo Kolocɔlɔw kàdoʔo na?

³³ Kolocɔlɔɔ wi fǎngi tɛ́ʔɛ n mii pwɔɔ, ní wɔ́ɔ i mii kólogi síngi ni forogi.

³⁴ Wi i mii tɔ́lɔyi kàrigí àmɛɛ sɔ̀ɔbēle wóyo nyɛ lè, ní i mii có ni yéregi ǹjoʔo ma tɛ́ɛyi ni.

³⁵ Woro wi mii kɔ́yi tama kapɛɛnni na, fwɔɔ a mii kɔ́diriyi gbàn ni kanyɛɛnri sedege kíle.

³⁶ Mɔ n mɔ tunmɔzige-yárigi kaan mii ma, ki lè syɔɔli wóʔo, mɔ kaliigi n mii tɔʔɔ n yérige, mii n baa kpɔ́ʔɔ mɔ funjǎngi báriga ni.

³⁷ Mɔ bárigaw ni mii fé kelekele, mii nyɔ̌ngèle si ga téè tàra í.

³⁸ Mii i taari mii nigoobèle na ni nɛnɛ, mii i be nɛnɛ ni có, mii o lúrugu ni maa í fwɔɔ bi taa mii n be kálagi n kwɔ́ɔ péw.

³⁹ Mii i be kpúmɔn ni cɛnɛ ni cáan, pe ní o yìrigí í. Pe i tuun, mii si i mii tɔ́lɔyi taari be na.

⁴⁰ Mɔ n fǎngi tɛ́ʔɛ n mii pwɔɔ kapɛɛnni kánma na. Mɔ i mii kàsiitun-nyɛ́nbèle kùrú ni kaangi mii ma.

⁴¹ Mɔ n gi yaʔa a mii nigoobèle kàdoʔo kaan ni fé mii na. Bele mii kéeli bɛɛn lè mii a be nyɔ́ɔyi tɔ́n.

⁴² Pe n yákpogèle wáa, syɔɔfɔlɔ ga taa be na í. Pe n yákpogèle wáa Yawe kurugo, wi ga joo ní be ní í!

⁴³ Mii i be purɔ ni kàragi àmɛɛ cíbige nyɛ, gee káfalagi leé ni syée lè, mii i be tánʔana àmɛɛ kàlari-kóloyi fáriga nyɛ lè.

⁴⁴ Mɔ i mii syoo syɛ́ɛnbèle kàsii ma. Mɔ n mii télege syɛɛnfeleyi nyúngo na. Syɛ́ɛnbèle bele be lè mii da be cán í, bele bee n ba ni báara mii ma.

⁴⁵ Gee faala mii ga tɛ́nɛ̀ joo n gbàn lè, pe n lóʔo mii ma, táraa nikwɔɔ wòolo i maa n ba ni mii fáana.

⁴⁶ Táraa nikwɔɔ wòolo fanʔa i kwóo ni syée, pe i cɛ̀lɛ́ ni yirigi be tɛɛniriyi ni.

⁴⁷ Yawe i nyɛ sìi na, wee wi nyɛ lè mii Fálagi, ki n yɛlɛ waa bariga kaangi wi ma! Kolocɔlɔɔ wi lè mii Syɔɔfɔw, woro wi yɛlɛ waa wi kpɔ́ʔɔgi.

⁴⁸ Kapeegèle be kpéʔele mii na lè, Kolocɔlɔɔ wi ge gɔ̀lɔ́w wóo, woro wi syɛɛnfeleyi kùrú ni kaangi mii ma,

⁴⁹ woro wi mii yirigi mii nigoobèle nínge ni! Mɔ wi mii lúrugu mii kàsiitun-nyɛ́nbèle ǹjoʔo ni, mɔ wi mii syoo fungbanya nǎnbèle ma.

⁵⁰ Koro na mii a ra mɔ kpɔ̀ʔɔrɔ́ syɛɛnfeleyi nínge ni, ee Yawe! Sáā mɔ mɛ́ɛgi kpɔ̀ʔɔrɔlɔ ŋúnuyo ŋúu.

⁵¹ Yawe i kakpoloyo kpéʔele fànʔafɔw syɔɔlɔ kéele na wi nyɛ́nɛ n wòlo lè. Wi i funjànga kèlē kpéʔele wi wonyɛnɛ-wòlow ma, Davidi ní wi yòdaʔayi má wi koro kpéʔele làla o làla.