Ŋúnuyi 17 - Cebaara Bible 2010

Ŋúnuyi 17 Tɔ́ɔliw ni mɔ mii yiri, mii syɔɔ

1 Davidi nyɛ́ɛrigi.

¹ Davidi nyɛ́ɛrigi. Ee Yawe, sínni syɛ́ɛnrɛ lóʔo, ki n yɛlɛ mi mii sùpili lóʔo, líiyi cáan mi mii nyɛ́ɛrigi lóʔo, jànvaa nyɔ́ɔ ni ban gi yiri í.

² Mɔ tiimaa wi yɛlɛ bi mii kútiiw ceri, mɔ nyapiigèle n yɛlɛ bi sínni sámaga wéle!

³ Mɔ i mii fúngi sɛʔɛ, mɔ i gi saanri ni wéle yébiligi ni, mɔ i mii sɛʔɛ ni wéle, mɔ si a yafyɛn nyaa mii na í, mii n gi kɔ̀rirɔ jàngó mii a kɔ́ kapeele pye ní mii nyɔ́ɔgi ní í.

⁴ Syɛ́ɛnbèle kapyere nyáana n mii kaan a mii i niyɛɛ kɔ̀rɔsíi syɛɛnpeebèle kóloyo na mɔ nyɔɔsyɛɛnri báriga ni.

⁵ Amɛɛ mii mii nyɔ̌ngèle nii ni syée mɔ wógèle ni lè, mii tɔ́lɔyi ga téè wàli n yiri kólogi ni í.

⁶ Ee Kolocɔlɔɔ, mii i mɔ mɛ́ɛgi yiri, níì cán mɔ a lóʔo mii ma! Mɔ líiyi cáan naa mii ma, mi mii syɛ́ɛnri lóʔo!

⁷ Bele be làra mɔ taana lè, mɔ wee wi be syoo be wɔʔɔfɔbèle ma ní mɔ kaliigi ní lè, ki n yɛlɛ mi mɔ kpɔʔɔnɛʔɛri tɛ̀ɛn.

⁸ Da mii kɔ̀rɔsíi àmɛɛ nyapiisyɔɔn nyɛ lè. Mii làriga mɔ fókaanyi láara ni

⁹ syɛɛnpeebèle na, poro bele be mii wɔʔɔ lè, mii nigootanʔabèle bee pe mii le lè nínge.

¹⁰ Pe n be fúnyi tɔ́n nyínimi kàbaan na, pe i nɛ̀ɛnyɛnɛgi syɛ́ɛnrɛ nyuu be nyɔ́ɔyi ni.

¹¹ Pe n mii nɛnɛ n cò, pe n mii màʔa n kwɔ́ɔ, pe n be nyapiigèle còolo mii na bi mii cáan tári na.

¹² Pe n càaraɔ wíri, wee kateegi jáa lè a wi i kaara caa, ní càarabiige, gee gi làra ni yarigaa sige lè.

¹³ Yawe, ki n yɛlɛ mi yìri mi wi fàra mi wi cáan tári na! Mɔ ŋɔséew tɛ́ʔɛ mi mii syɔɔ syɛɛnpeew ma.

¹⁴ Yawe, be kálagi mi yirige yaà ní mɔ kɔ́gi ní, pe lè dulunyanw naa syɛ̀ɛnnɛ! Pe lɛɛli li nyɛ dulunyanw naa, mɔ i be fícariyi nyìngí ní mɔ lɔ́ri ní, pe pìíbèle n taa n tín, pe i be yataari yaari naa be pìíbèle ma peyɛɛ kàdoʔo ma.

¹⁵ Mii si na, mii a tɔ̀nɔ́ mɔ yɛ́ɛgi nyaa ní sínnɛ ní. Mii ga yìri ŋúnɔmi na, mɔ nyaani a mii yɛlɛ.