Ŋúnuyi 16 - Cebaara Bible 2010

Ŋúnuyi 16 Syɔ́ɔnwee Kolocɔlɔɔ syɔɔ kùu ma lè wi fundaanri

1 Davidi tára-nyɔ́ɔ-na ŋúnugi.

¹ Davidi tára-nyɔ́ɔ-na ŋúnugi. Ee Kolocɔlɔɔ, da mii kpáaw wéle! Níì cán mɔ taana mii fàn n làra.

² Mii n gi joo Yawe ma níì wi pye: «Yawe, mɔ wi nyɛ mii Kàfɔw, yacanga ní o nyɛ mii ma n sɔ̀lɔ mɔ na í!»

³ Syɛɛncanbèle be nyɛ lè tári ni, poro be nyɛ fǎngi wodelege gee gi lè mii fundaanri myɛ.

⁴ Pe i be yasunyi nɛʔɛgi, pe i fé ni syée kolocɔlɔbèle pèle nikwɔɔlɔ kurugo. Mii a be sìsyaanw sáriga-yólogoo wòlo í, mii a be mɛ́ɛyi yeri mii nyɔ́ɔgi ni í.

⁵ Yawe wi nyɛ mii kɔ́rigi lɛɛlɛ, ní mii yagbaali. Mɔ kɔ́yi ni mii nyɛ̀ʔɛnaw nyɛ.

⁶ Mii lɛɛgèle n pye lɛɛdaangéle. Kɔricànga gi nyɛ mii ma.

⁷ Mii i Yawe kpɔ̀ʔɔrɔ́, woro wee wi mii yaragi lè. Alí yébiligi ni mii fúngi i mii kɛɛlɛ.

⁸ Mii i Yawe wéle niyɛɛ yɛ́ʔɛ ma làrigèle myɛ ni, n wi yaʔa mii kàliige ma, mii a tée cúngo í.

⁹ Koro na mii wɔ́ɔ i nyɛ fundaanra na, a mii pǐli i muguri, àlí mii céri a sámaga pye ŋɔ́ndaala na.

¹⁰ Níì cán mɔ a mii pǐli yaʔa kúbèle tɛɛkòrogo ni í, mɔ a fɔ̀lɔ bi mɔ Wojanw yaʔa wi fɔ́nʔɔ í.

¹¹ Mɔ a sìíw kólogo tɛ̀ɛn mii na. Fundaannɛʔɛrɛ i nyɛ mɔ yɛ́ʔɛ ma, kataangēle i nyɛ mɔ kaliige ma làrigèle myɛ ni.