Ŋúnuyi 148 - Cebaara Bible 2010

Ŋúnuyi 148 Kolocɔlɔɔ sòololi nyɛ̀ʔɛni ni, ní tári na

¹ Aleluya! Yaa Yawe kpɔ̀ʔɔrɔ́ yaà nyɛ̀ʔɛgèle fúngo ni! Yaa wi sòoló yaà ǹjoʔo ma tɛ́ɛyi ni!

² Yaa wi sòoló, yele wi nyɛ̀ʔɛni tundunbéle myɛw! Yaa wi sòoló, yele wi sùlasiibèle myɛw!

³ Yaa wi sòoló, cángi ní yégi! Yaa wi sòoló, yele ŋɔripiigèle myɛ ye nyín lè!

⁴ Yaa wi sòoló nyɛ̀ʔɛgèle ǹjoʔo ma nyɛ̀ʔɛgēle, n fàra yele na ye nyɛ lè nyɛ̀ʔɛgèle ǹjoʔo ma lòyo!

⁵ Ki n yɛlɛ yáriri myɛ í da Yawe mɛ́ɛgi sòoló! Níì cán wi n syɛɛnrɛ joo, a di sámaga.

⁶ Wi n di sámaga n télege di kòro nya làla o làla bàngwɔɔ. Wi n làlwa télege, wee wi lè wi a kálagi í.

⁷ Bi ye yaʔa tári na, yaa Yawe sòoló, yele sólomi lɔ̀ʔɔ yákpoloyo, ní yele weecuruyi myɛ.

⁸ Náagi ní zěsolomi, lànɛɛzyiw ní nìgolowirigi, ní káfalakpɔɔgi gi wi syɛ́ɛnri forogi lè,

⁹ nyanbeleyi ní dǎndamayi myɛ, tiisanyi ní sɛdiri tíiri myɛ,

¹⁰ sìnbirigi yaweere, ní yaweeree myɛ be nàʔá lè, yáriree di fulolo lè, ní dee di yìrigí lè fókaanya na,

¹¹ tári fànʔafɔɔlɔ, ní syɛɛnfeleyi myɛ, fànʔafɔbiigèle, ní tári kútiijoobéle myɛ,

¹² nìgɔcaribèle, ní pìcaabèle, nànlɛɛbèle ní pìíbèle!

¹³ Ki n yɛlɛ paa Yawe mɛ́ɛgi sòoló! Níì cán woro nibin mɛ́ɛgi gi nyɛ ǹjoʔo ma. Wi nìjangbɔɔri i nyɛ tári, ní nyɛ̀ʔɛni nyúngo na.

¹⁴ Wi n wi syɛ́ɛnbèle fànʔa kpɔ́ʔɔ, koro i nyɛ wi syɛɛncanbèle myɛ sòololo kéele, Isirayɛli ye wóli, syɛɛnfelegi bee gi nùuni wi na lè. Aleluya!