Ŋúnuyi 146 - Cebaara Bible 2010

Ŋúnuyi 146 Yawe wi nyɛ fànʔafunvɔbèle kpaàweleo

¹ Aleluya! Ni fungo, da Yawe sòoló!

² Yawe mii caa bàā sòoló mii sìíw myɛ ni, n tɛ́nɛ̀ mii yaʔa beè, mii a ra mii Kolocɔlɔw kpɔ̀ʔɔrɔlɔ ŋúnuyo ŋúu.

³ Yele a kɔ́ yeyɛɛ daʔa mɛ́ɛkpoloyi fɔ̀ɔlɔ na í, wàlá syɔɔnwaa na, wee wi lè wi a gbǎn syɔɔlɔ kaan í.

⁴ Wi ŋɔ́ngari ga yiri wi ni, wi n lúru n jée támiigi ni, cángi bee na wi katimanagèle myɛ n kálagi.

⁵ Syɔ́ɔnwee dɛ̀ɛmɛfɔlɔ wi ga pye lè Zyakɔbi Kolocɔlɔw, syɔ́ɔnw bee i nyɛ dùba pyà, woro wee wi wi sɔ̀ngumi taʔa lè Yawe wi Kolocɔlɔw na!

⁶ Wee wi nyɛ̀ʔɛni ní tári faan lè, ní sólomi lɔ̀ʔɔ, n fàra di fúnyi yárira myɛ na, wi n kányɛɛgi sámaga n màra làla o làla.

⁷ Bele na be fǎngi gbàn lè, wi i be dɛ̀ɛmɛ́. Wi i lìile kaangi kateèjaabèle ma. Yawe i kàsolebèle yirigi ni yaari.

⁸ Yawe i fúunbèle paʔala. Syɛ́ɛnbèle be kùru lè, Yawe i be sánʔana ni síngi. Syɛɛnsinbèle kéele n Yawe dɛ́nɛ.

⁹ Yawe i nibɔnbèle kpáa wéle, wi i círio ní lɔgucaa dɛ̀ɛmɛ́, kàjáa wi i syɛɛnpeebèle kóloyo nyáʔami.

¹⁰ Yawe i nyɛ wodɛ́ɛɔn ní fǎngi na bàngwɔɔ. Ee Siyɔn, mɔ Kolocɔlɔw a pye beè yìrigèle myɛ syɛ̀ɛnnɛ ma! Aleluya!