Ŋúnuyi 145 - Cebaara Bible 2010

Ŋúnuyi 145 Mɔ fangi i nyɛ bàngwɔɔ fànʔa

1 Kpɔ̀ʔɔrɔli ŋúnugo. Davidi wógi.

¹ Kpɔ̀ʔɔrɔli ŋúnugo. Davidi wógi. Mii a ra mɔ kpɔ́ʔɔgi, mii Kolocɔlɔw, mɔ wi lè Fànʔafɔw! Mii a ra mɔ mɛ́ɛgi kpɔ̀ʔɔrɔ́ làla o làla kwɔ́ɔmɔ fun.

² Mii a ra mɔ kpɔ́ʔɔgi canʔa o canʔa sáā mɔ mɛ́ɛgi sòoló làla o làla kwɔ́ɔmɔ fun.

³ Yawe n kpɔ́ʔɔ níì tɔ̀nɔ n yɛlɛ ní sòololo ní, tɛɛ̀laʔala o nyɛ wi kpɔ́ʔɔri na í.

⁴ Yìrigèle myɛ syɛ̀ɛnnɛ a ra mɔ kapyegèle kéele kpɔ́ʔɔgi, pe a ra mɔ séew kèlē nyuu da tèé.

⁵ Mii a ra mɔ séekpɔɔw nìjangbɔɔrɔ kéele nyuu. Mii a ra mɔ bingaataa-kérigèle ŋúu.

⁶ Mɔ séew wi nyɛ lè fyáakpɔɔrɔ wóo ní, pe a ra wi kéeli nyuu, mii a ra mɔ kpɔ́ʔɔganmi kéele nyuu.

⁷ Pe a ra mɔ funjàngbɔɔgi kéele sɔ̀ngí da taagi bàā nyuu sáā mɔ kányɛɛgi kéele nyuu ŋúnuyi ni.

⁸ Nyinidaara fɔ́lɔ ní fûnnyinge fɔ́lɔ wi nyɛ Yawe, wi fúngi o taanri kelekele í, á wi wɔ́ɔ̀ nyìn funjǎngi na.

⁹ Yawe n nyɔɔ syɛ́ɛnbèle myɛ kàbaan na, wi i nyinimɛ taagi wi yafaanri myɛ na.

¹⁰ Yawe, mɔ yafaanri myɛ a ra bariga kaangi mɔ ma! Mɔ tágala syɛ́ɛnbèle a ra mɔ kpɔ́ʔɔgi.

¹¹ Pe a ra mɔ fangi nìjanra kéele nyuu, bàā nyuu mɔ séekpɔɔw kéele na.

¹² Bàā mɔ séew kapyegèlē tèé syɔɔn ye na, ní mɔ nijangbɔɔri fànjànga.

¹³ Mɔ fangi i nyɛ bàngwɔɔ fànʔa, mɔ kundigiri a kòro bàā syée yaà yìrigèle myɛ syɛ̀ɛnnɛ nyúngo na. Yawe i nyɛ tágala syɔ́ɔn wi nyɔɔfaliyi forolo na, gee myɛ wi kpéʔele lè, ki i wi funjǎngi tèé.

¹⁴ Bele myɛ be tuun lè, Yawe i be toori ni yéregi, bele be kùru lè, wi i bele bee sánʔana ni síngi.

¹⁵ Pe myɛ n be sɔ̀ngumi taʔa mɔ na, ní i wéle mɔ ma, mɔ wi yaliiri kaangi be ma ti làrigaanni ni.

¹⁶ Mɔ i mɔ kɔ́gi múru ni sìi yáriri myɛ tíngi ti màkow yaliire na.

¹⁷ Yawe n sín wi kóloyi myɛ ni, wi i nyɛ funjànga fɔ́lɔ wi kapyegèle myɛ ni.

¹⁸ Yawe n nùuni wi mɛ́ɛgi yerifɔɔlɔ myɛ na, poro bele myɛ pe wi mɛ́ɛgi yiri kányɛʔɛ na lè.

¹⁹ Bele be fɛ̀ɛgí wi na lè, wi i bele bee nyɛ́nɛ kèlē forogi, wi i be sùpiigèle lúro ní i be syoo.

²⁰ Bele myɛ be tàmaga le ní Yawe ní lè, wi i be kpáaw wéle, kàjáa, wi i syɛɛnpeebèle myɛ kálagi.

²¹ Mii nyɔ́ɔgi a ra Yawe sòololi kéele nyuu, cere yáriri myɛ n yɛlɛ bàā wi mɛ́ɛcǎngi kpɔ́ʔɔgi làla o làla kwɔ́ɔmɔ fun.