Ŋúnuyi 144 - Cebaara Bible 2010

Ŋúnuyi 144 Fànʔafɔlɔ nyɛ́ɛrigɛ

1 Davidi wóʔo.

¹ Davidi wóʔo. Kpɔ̀ʔɔrɔli n yɛlɛ Yawe na, wi lè mii Fálagi, wi i mii kɔ́yi tama kapɛɛnni na ni mii kábegèle tama kapɛɛnni kpúmɔnganma na,

² wi i nyɛ mii kacànnafɔw, ní mii Kènirigi, mii kpaataʔa-tɔ́nɔgi ní mii Syɔɔfɔw, ní mii tunmɔzige-yárigi, gee taana mii làra lè, woro wi mii syɛ́ɛnbèle kàragí ni kaangi mii ma!

³ Yawe, syɔɔn i nyɛ nyàʔá, koro si mɔ kaan mɔ í wi cán? Syɔɔn-pya i nyɛ nyàʔá koro si mɔ kaan mɔ í da wi kéeli córo?

⁴ Syɔɔn i nyɛ àmɛɛ nyɔɔ káfalaga nyɛ lè, wi sìíw canya i nyɛ àmɛɛ kànyinnɛ nyɛ, lee li sɔ̀lɔ́ lè.

⁵ Yawe, mɔ nyɛʔɛni jùngu mi tìgi naa! tánga nyanbeleyi na yaa wírige yirigi!

⁶ Nyɛ̀ʔɛni sàli mi mii nigoobèle cariga! Mɔ ŋáayi wáa mi be nɛnɛ!

⁷ Mɔ kɔ́yi sánʔa yaà ǹjogi ni, mii syɔɔ, mii kíle mi yirige lòkpoloyi ni, mii yirige bele kɔ́yɔ ni be yìri táraa nikwɔɔ ma lè,

⁸ poro bele nyɔ́ɔyɔ yi jànvaa syɛ́ɛnri nyuu lè, ní i be kàliiyi yìrigí jànvaaw kàliya na.

⁹ Ee Kolocɔlɔɔ! Mii a ra ŋúnuvɔngɔ ŋúu mɔ ma, mii a ra mɔ kpɔʔɔrɔli ŋúnuyo ŋúu mɛ́ɛngèle kɛɛ kɔ̀rí ni.

¹⁰ Mɔ wi syɔɔli kaangi fànʔafɔbèle ma, ní i mɔ falipyew Davidi syoo ŋɔséepeew ma.

¹¹ Mii syɔɔ, mii yirige bele kɔ́yɔ ni be yìri táraa nikwɔɔ ma lè, poro bele nyɔ́ɔyɔ yi jànvaa syɛ́ɛnri nyuu lè, ní i be kàliiyi yìrigí jànvaaw kàliya na.

¹² Wolo nànbiigèle n yɛlɛ ge pye àmɛɛ tiifiinvɔ́nyɔ nyɛ, yee yi lɛɛmɛ dɛ́nɛ lè. Wolo calipiigèle si pye àmɛɛ jɛ̀ɛ́nnɛ gaangéle nyɛ, gele be sámaga n tan n fànʔafɔ-gbaʔa fère lè.

¹³ Wolo gbòdungèle n yɛlɛ kaa nyìngí yaliiri féleye myɛ na bàā ŋuu. Wolo bǎbèle sáā sii bàpiigéle saala kagunɔ kagunɔbèlē saʔa, àlí selebingéle kagunɔ kagunɔbèlē saʔa wolo tári ni.

¹⁴ Ki n yɛlɛ wolo nǐyi í báriga. Weʔe a ní kɔ́ fùru í, puloro a ní kɔ́ pye yaà í, sùpiiwáara a ní kɔ́ lóʔo wolo kadàlayi na í!

¹⁵ Bele má gi nyɛ kánmi bee na lè, pe i nyɛ dùba pìibēle! Yawe ga pye syɛɛnfelegee Kolocɔlɔɔ lè, bele bee i nyɛ dùba pìibēle!