Ŋúnuyi 143 - Cebaara Bible 2010

Ŋúnuyi 143 Yawe mɔ a kɔ́ pye kútii na ní mii ní í

1 Davidi ŋúnugi.

¹ Davidi ŋúnugi. Yawe, ki n yɛlɛ mi mii nyɛ́ɛrigi lóʔo, mɔ líiyi cáan mi mii nyɛ́ɛrigboloyi lóʔo! Lóʔo mii ma mɔ kányɛɛgi, ní mɔ sínni báriga ni.

² Mɔ a kɔ́ pye kútii na ní mɔ falipyew ní í, níì cán niweeo faala ga sín mɔ yɛ́ʔɛ ma í!

³ Nigoow n yìri mii pǐli kurugo, wi n mii sìíw cáan ni tánʔana. Wi n mii kɔ́ri a mii i kòró yébilimi tɛ́ɛyɛ ni àmɛɛ booma woguubèle nyɛ lè.

⁴ Mii pǐli fànʔa n kwɔ́ɔ mii ni, mii fúngi n nyáʔami mii na.

⁵ Mii i sɔ̀ngí ni taagi booma cányi kéele na, mii i mɔ kapyegèle myɛ kéele sɔ̀ngí, mii i sɔ̀ngí mɔ kɔ́yi fáli kéele na.

⁶ Mii n mii kɔ́yi yìrige mɔ ma. Mɔ kéeli i nyɛ mii fúngi ni àmɛɛ lɔ̀ʔɔ láa nyɛ táwaara na lè. Ŋɔ́ndaala

⁷ Wári mi lóʔo mii ma, Yawe! Mii pǐli n nan tɛɛ̀laʔali na. Mɔ a kɔ́ mɔ yɛ́ɛgi làriga mii na í! Kapye koro ban í, mii a pye àmɛɛ bele nyɛ be tíri weecurugi ni lè.

⁸ Ki yaʔa mii í mɔ funjǎngi kéele lóʔo nyǐngi nyɔ́ɔ na pɛɛn pɛɛn! Níì cán mɔ na mii niyɛɛ daʔa. Kólogi tɛ̀ɛn mii na, gee ni mii yɛlɛ bàā táanri lè! Níì cán mii n mii fúngi fíige mɔ ma.

⁹ Ee Yawe, mii syɔɔ mii nigoobèle ma! Mɔ taana mii làra.

¹⁰ Mii tama mii í da mɔ nyɛ́nɛ kérigèle kpéʔele! Níì cán mɔ wi nyɛ mii Kolocɔlɔw. Ki n yɛlɛ mɔ Piicanni í mii yɛ́ɛgi kíni kôzingi ni!

¹¹ Yawe, sìi kaan mii ma mɔ mɛ́ɛgi kéele na! Mii pǐli yirige wɔʔɔgi ni mɔ sínni kéele na!

¹² Mi mii nigoobèle kwɔ́ɔ péw mɔ funjǎngi báriga ni, bele myɛ be cáan ní mii pǐli ní lè, be kálagi, níì cán mii i nyɛ mɔ falipyeo.