Ŋúnuyi 141 - Cebaara Bible 2010

Ŋúnuyi 141 Yawe da mii jooganmi kɔ̀rɔsíi

1 Davidi ŋúnugi.

¹ Davidi ŋúnugi. Yawe, mii i yákpoli wáa mɔ kurugo, wári mi pan mii ma! Líiyi cáan mi mii yákpoli lóʔo, lǎli ni mii ga ni mɔ yiri lè!

² Ki n yɛlɛ mii nyɛ́ɛrigi í da lúru mɔ yɛ́ɛgi ma àmɛɛ nùndaanni yasorigogo nyɛ lè, mii kɔ́yi yìrigele í pye àmɛɛ cângwɔɔgi nyɔ́ɔ sáriga nyɛ lè!

³ Yawe, ki n yɛlɛ mi kpaàweleo tɛ́ʔɛ mii nyɔ́ɔgi na, da mii nyɔɔsaliyi kpàánweele kpáa wéle!

⁴ Mɔ a kɔ́ mii fúngi yaʔa gi kàri kapeelaa faala kabaan na í, mii í kɔ́ ra tètée kérigèle pínɛ da kpéʔele ní kakolobyebèle ní í. Mii a caa kɔ́ be lìidaannaa faala laala wéle í!

⁵ Syɛɛnsinw n yɛlɛ wi mii kpúmɔn, gee bee a pye tàmaga kéele. Wi ga fúlo mii na, gee bee a pye sìnmɛ mii nyúngi ni, mii nyúngi a kɔ́ gee bee cée í. Mii nyɛ́ɛrigi si a ní yìri be péemi kánma na.

⁶ Ki n yɛlɛ pe kútiijoobèle í ŋɔrigɔ wáa fálaya kolodìgimɛ ni, lǎli bee ni syɛ́ɛnbèle a mii syɛɛnjóori lóʔo, níì cán ti n tɛ́nɛ.

⁷ Amɛɛ be tára fála ni yabala lè, ànbée wolo kaceri cariga kúbèle tɛɛkòrogo kpàánweele nyɔ́ɔ na.

⁸ Ee Kàfɔw Yawe, mɔ ni mii nyapiigèle nyɛ, mɔ má mii niyɛɛ kàlifáa, mɔ a kɔ́ mii sìíw cáan yaʔa í!

⁹ Da mii kpáaw wéle karinyangi na pe le mii na lè, ní syɛɛnnaa-sìnzinbèle pára na!

¹⁰ Ki n yɛlɛ syɛɛnpeebèle í cò pe tiimaa cɔ̀ɔ́w na, mii si syɔɔ làrinijanni ni!