Ŋúnuyi 140 - Cebaara Bible 2010

Ŋúnuyi 140 Syɔ́ɔnwee mɛ́ʔɛ be kálagi lè woro nyɛ́ɛrigi

¹ Ŋúnuŋùúbèle kùndigi wóʔo. Davidi ŋúnugi.

² Yawe, mii syɔɔ syɛɛnpeebèle ma! Da syɛɛntanʔabèle kpáa wéle mii na,

³ Poro bele be tímana kapeeyi kpéʔelele na be fúnyi ni lè, ní i kapɛɛngèle yìrigí canʔa o canʔa.

⁴ Pe i be nyíngèle jɔɔgi àmɛɛ wàbiga nyɛ lè, màátɔn sɔ́ɔnrɔ i nyɛ be nyɔɔwari láara ni. Ŋɔ́ndaala

⁵ Yawe, da syɛɛnpeebèle kɔ́yɔ kpáa wéle mii na! Da syɛɛntanʔabèle kpáa wéle mii na, poro bele be gi tímana bi mii cáan lè!

⁶ Nɛ̀ɛnyɛnɛgi fɔ̀ɔlɔ n karinyanga le mii na. Pe n mɛɛngéle ní cɔ̀ɔ cáan kólogi nyɔ́ɔ na, pe n parà le mii tɛɛsɔ̀lɔgi ni. Ŋɔ́ndaala

⁷ Mii n gi joo Yawe ma níì jo: «Mɔ wi nyɛ mii Kolocɔlɔw!» Yawe, líiyi cáan mi mii nyɛ́ɛrigboloyi lóʔo!

⁸ Kàfɔw Yawe, mɔ wi lè mii syɔɔli fànʔa, mɔ i mii nyúngi tɔ́ngi kapɛɛnni canʔa na.

⁹ Yawe, mɔ a kɔ́ syɛɛnpeew sɔ̀ngurɔ yaʔa di foro í, mɔ a kɔ́ wi katimanagèle yaʔa ge kpéʔele í, koro ga pye wi a kɔ́ ra wiyɛɛ gbɔ́ʔɔgi í. Ŋɔ́ndaala

¹⁰ Bele si be mii máari lè, ki n yɛlɛ be sìnzinmi nyɔɔsyɛɛnrɛ í lúru kòro be nyúnyi ni!

¹¹ Naàniganra n yɛlɛ di wo be na! Ki n yɛlɛ pe be wáa náagi ni, ní weekpoloyi ni, yee ni lè pe a ní gbǎn lúgu yiri í!

¹² Mɛ́ɛkalagiɔ ga yɛlɛ wi kòro sìi na tári ni í. Wɔʔɔlɔ si too syɛɛntanʔaw na bi kòro wi kurugo.

¹³ Mii n gi cán Yawe a sínnɛ kaan fɔ̀rɔgɔfɔw ma, bi tànʔa kaan foomɔfɔbèle ma.

¹⁴ Kányɛʔɛ na, syɛɛnsinbèle a ra mɔ mɛ́ɛgi kpɔ̀ʔɔrɔ́, syɛ́ɛnbèle bele fúnyo yi fílige lè, poro a tɛ́ɛn mɔ yɛ́ʔɛ ma.