Ŋúnuyi 14 - Cebaara Bible 2010

Ŋúnuyi 14 Tágala syɛ́ɛnbèle ní be Kolocɔlɔw dulunyan-gálagiw ni

1 Ŋúnuŋùúbèle kùndigi wóʔo. Davidi ŋúnugi.

¹ Ŋúnuŋùúbèle kùndigi wóʔo. Davidi ŋúnugi. Nilabalaga ki gi nyuu kiyɛɛ fúngi ni níì jo: «Kolocɔlɔɔ o yaà í!» Pe n peyɛɛ gálagi, pe n kapeekpoloyo kpéʔele. Syɔɔn faala o beè, wee wi kacàngēle kpéʔele lè í.

² N Yawe yaʔa nyɛ̀ʔɛni na, wi n wi nyúngi jùngu ni syɔɔn ye wéle bi gi nyaa kapye wàa i yaà, wee wi cìlige lè, wee wi Kolocɔlɔɔ caa lè.

³ Pe myɛ n kólogi cée, pe myɛ n kálagi. Syɔɔn faala o beè, wee wi kacàngēle kpéʔele lè í, àlí syɔɔn nibin.

⁴ Kakolobyebèle ga yarigaa cán wii ì, poro bele be mii syɛ́ɛnbèle káa àmɛɛ be búru káa lè? Pe o Yawe mɛ́ɛgi yiri í.

⁵ Nɛɛ bee fyáari be cò a be i cɛ̀lɛ́, níì cán Kolocɔlɔɔ i nyɛ wi syɛɛnfelegi nínge ni gi sín lè.

⁶ Yele i foomɔfɔw kakɔrirɔlɔ kàragí bi kataanra wáa wi na, kàjáa Yawe wi nyɛ wi tɛɛlàragi.

⁷ Ee, mii i caa bi Isirayɛli syɔɔli nyaa, lee li a yìri Siyɔn ma lè! Lǎli ni Yawe ga wi syɛ́ɛnbèle yirige púlori ni n lúru n pan lè, lǎli bee ni Zyakɔbi a ra muguri, Isirayɛli a ra fundaanra kpéʔele.