Ŋúnuyi 139 - Cebaara Bible 2010

Ŋúnuyi 139 Yawe, mɔ n mii kánmi myɛ cán

1 Ŋúnuŋùúbèle kùndigi wóʔo. Davidi ŋúnugi.

¹ Ŋúnuŋùúbèle kùndigi wóʔo. Davidi ŋúnugi. Ee Yawe, mɔ n mii sɛʔɛ n mii kánmi myɛ cán.

² Lǎli ni mii ga tɛ́ɛn lè ní lǎli ni mii ga yìri lè, mɔ n gee bee cán, sáni mii í sɔ̀nguraa sɔ̀ngi lè, mɔ maa téè di cán.

³ Lǎli ni mii ga ni táanri lè, ní lǎli ni mii ga sínɛ lè, mɔ n gee bee cán, mɔ i nyɛ mii kóloyi myɛ cánvɔlɔ.

⁴ Níì cán syɛɛnrɛ faala o nangi mii nyínni na, kapye mɔ ga téè di cán n kwɔ́ɔ í, Yawe!

⁵ Mɔ n mii màʔa n kpàra kàdoʔo ma, ní yɛʔɛ̀ ma, níì mɔ kɔ́gi taʔa mii na.

⁶ Bìngaara kacánmi bee félege n kpɔ́ʔɔ n sɔ̀lɔ mii cánna na, pi i nyɛ ǹjoʔo ma, mii a gbǎn bi cò í.

⁷ Sán mii a kári jàngó bi léeli mɔ Pili na? Ba sán mii a fǎn kári bi léeli mɔ yɛ́ɛgi na?

⁸ Mii ga lúgu n sáà jée nyɛ̀ʔɛni ni, mɔ i yaà. Mii ga jée n sínɛ kúbèle tɛɛkòrogo ni, wéle, mɔ i yaà.

⁹ Mii ga nyǐnjerigi fókaanya láa, níì kári n sáà tɛ́ɛn sólomi lɔ̀ʔɔ màʔamee na,

¹⁰ mɔ kɔ́gi a wɔ́ɔ mii kɔ́ri yaà beè, mɔ kaliigi a mii cò yaà.

¹¹ Mii ga gi joo níì jo: «Yébiliwɔɔli í mii tɔ́n, gbɛ̀ɛ́nmi í pye yébilimɛ mii kàbanyi myɛ na,»

¹² àlí yébilimi o nyɛ yébilimɛ mɔ ma í, yébiligi i gbɛ̀ɛ́nmi yirigi àmɛɛ cángi nyɛ lè, yébilimi ní gbɛ̀ɛ́nmi i nyɛ mɔ ma sèjira.

¹³ Mɔ wi mii zǎloogèle sámaga, mɔ n mii soʔolo soʔolo niyɛɛ na mii nɔ́ɔw láʔa ni yaà.

¹⁴ Mii i bariga kaangi mɔ ma, níì cán mii i nyɛ bìngaara yafanʔa. Mɔ kapyegèle i nyɛ bìngaara woʔolo, mii fúngi n gee bee sámaga n cán.

¹⁵ Mii céri tɛ́ɛgaa faala da làra mɔ na í, lǎli ni mɔ mii sámaga làrami tɛ́ʔɛ ni lè, níì mii soʔolo soʔolo niyɛɛ na tári tɛɛcùruyo ni lè.

¹⁶ Lǎli ni mii céri pye lè sìnzamaga ni, mɔ nyapiigèle maa ni mii nyaagi. Ki myɛ maa sɛ́bɛ mɔ sɛ́bɛw ni, àlí cányee mɔ tímana mii í kwɔ́ɔ lè, n gi yaʔa ki kàa da kɔ́ɔ̀ pye yaà í.

¹⁷ Ee Kolocɔlɔɔ, mɔ sɔngumi kèlē coganma n gbàn mii ma, ke kánmi n tɔ̀nɔ n nɛʔɛ!

¹⁸ Mii ga maa ni caa bi ge córo, ke n nɛʔɛ n sɔ̀lɔ táminyɔɔw na. Mii ga yìri ŋúnɔmi na, mii sèʔé i nyɛ ní mɔ ní.

¹⁹ Ee Kolocɔlɔɔ, mɔ maa yɛlɛ bi dée syɛɛnpeew kpóo! Yele syɛɛnkpoobèle, ye léeli mii na!

²⁰ Pe i nyuu mɔ kéeli na kanbeemɛ na, pe i mɔ mɛ́ɛgi yiri gbanzan!

²¹ Yawe, bele mɔ kéeli bɛɛn lè, pe kéeli a mii bɛɛn ì? Bele be yìrigí mɔ kánmi na lè, poro a pye mii yanibɛɛnrɛ ì?

²² Pe kéeli n mii bɛɛn n sáà nan bɛɛnni láʔala myɛ na, pe i nyɛ mii nigoolo.

²³ Ki n yɛlɛ mi mii tímana mi wéle, ee Kolocɔlɔɔ, mi mii fúngi cán! Mii sɛʔɛ mi wéle mi mii sɔ̀nguri cán!

²⁴ Mí gi wéle kapye mii i nyɛ kobeʔe ni, mí mii yɛ́ɛgi kíni bàngwɔɔ kólogi ni!