Ŋúnuyi 135 - Cebaara Bible 2010

Ŋúnuyi 135 Mii n gi cán, Yawe n kpɔ́ʔɔ

¹ Aleluya! Yaa Yawe mɛ́ɛgi sòoló, yaa gi sòoló yele Yawe falipyebèle,

² yele bele ye yèré Yawe kpáagi ni lè, wolo Kolocɔlɔw kpaʔa kadàagēle na lè.

³ Yaa Yawe sòoló! Níì cán Yawe n nyɔɔ. Yaa wi mɛ́ɛgi kpɔ̀ʔɔrɔlɔ ŋúnuyo ŋúu! Níì cán wi fúngi n nyɔɔ.

⁴ Níì cán Yawe n Zyakɔbi nyɛ́nɛ n wòlo a wi pye woro wóo, wi n Isirayɛli nyɛ́nɛ n wòlo a wi pye woro tiimaa wóo.

⁵ Mii n gi cán ncan Yawe n kpɔ́ʔɔ, wolo Kàfɔw n sɔ̀lɔ kolocɔlɔbèle myɛ na.

⁶ Yariga o yariga gi Yawe dɛ́nɛ lè, koro wi kpéʔele nyɛ̀ʔɛni ní tári na, ní sólomi lòyo, ní weecuruyi myɛ ni.

⁷ Woro wi fàfaanyi yìrigí yaà tári láʔagéle ma, woro wi nyɛ̀ʔɛni nyɛ́ʔɛnɛmɛ kpéʔele ní zěgi ní, woro wi káfalagi yirigi wi lɔ́ri tɛɛkɔnyɔ ni a ki i funu.

⁸ Wi n Ezyipiti pìiselibèle kpóo, n syɛ́ɛnbèle pìiselibéle pínɛ yaweeri pìiselibéle ni.

⁹ Wi n fɛ̀ɛ́bèle ní kakpoloyi tórigo yaà mɔ níngi ni, Ezyipiti, Faraɔnw ní wi falipyebèle myɛ kánma na.

¹⁰ Wi n syɛɛnfeleye saʔa kálagi, níì fànʔafɔ-nìribēle saʔa kpóo.

¹¹ Sihɔn wi lè Amɔri syɛɛnfelegi fànʔafɔlɔ, ní Ogi wi lè Basyan fànʔafɔw, n fàra Kanaan tári fànʔafɔɔlɔ myɛ na.

¹² Wi n be tári kaan kɔrigɔ, wi syɛ́ɛnbèle Isirayɛli ye má kɔrigɔ.

¹³ Ee Yawe, mɔ mɛ́ɛgi a kòro beè làla o làla, ee Yawe, mɔ kéeli sɔ̀ngudaara a kòro beè yìrigèle myɛ syɛ̀ɛnnɛ ma.

¹⁴ Níì cán Yawe i wi syɛ́ɛnbèle kútii cɛnɛ, wi i nyinimɛ taagi wi falipyebèle na.

¹⁵ Syɛɛnfeleyi yasunyo i nyɛ wálifiio ní tɛɛ̀, syɔɔn ye kɔ́yi fáli wii.

¹⁶ Nyɔɔyɔ i nyɛ yi na, yi si o nyuu í, nyapiigèlē i nyɛ yi na, yi si o nyaagi í,

¹⁷ líiye i nyɛ yi na, yi si o lúro í, ŋɔ́ngara o nyɛ yi nyɔ́ɔyi ni í.

¹⁸ Yi kpéʔelefɔbèle i nyɛ yi felege, ní bele myɛ be peyɛɛ daʔa yi na lè.

¹⁹ Isirayɛli kpáagi wòolo, yaa bariga kaangi Yawe ma! Aarɔn kpáagi wòolo, yaa bariga kaangi Yawe ma!

²⁰ Levii kpáagi wòolo, yaa bariga kaangi Yawe ma! Yele bele ye fɛ̀ɛgí Yawe na lè, yaa bariga kaangi Yawe ma!

²¹ Bariga n yɛlɛ bàā kaangi Yawe ma Siyɔn ni, woro wee wi nyɛ lè wodɛ́ɛɔn ní Zyerusalɛmi ni! Aleluya!