Ŋúnuyi 124 - Cebaara Bible 2010

Ŋúnuyi 124 Kapye Yawe da fàra wolo na í…

1 Njogi lúgufɔɔlɔ ŋúnugo. Davidi wógi.

¹ Njogi lúgufɔɔlɔ ŋúnugo. Davidi wógi. Kapye Yawe da fàra wolo na í, Isirayɛli ye n yɛlɛ bàā gee bee nyuu si jo:

² «Kapye Yawe da fàra wolo na í,» lǎli ni syɛ́ɛnbèle yìri wolo kurugo lè,

³ lǎli bee ni pe mǎà dée wolo jɔ́ɔ woweebèlē ní, be fundanʔari báriga ni.

⁴ Lǎli bee ni lòkpoloyi mǎà dée wolo wáa, cábiga a dée wolo pìígèle tɔ́n.

⁵ Lǎli bee ni lòjámaya a dée sɔ̀lɔ wolo sìíw ǹjoʔo ni.

⁶ Yawe n yɛlɛ waa wi kpɔ̀ʔɔrɔ́, àmɛɛ gi nyɛ lè wi ga wolo yaʔa pe gǎngèle ma ge sulugu í!

⁷ Wolo sìíw n syɔɔ àmɛɛ féjɛɛnnɛ gáà syɔɔ n yiri parileo pára ni lè. Pári n ceri, á wolo syɔɔ.

⁸ Yawe mɛ́ɛgi gi wolo dɛ̀ɛmɛ́, woro wee wi nyɛ̀ʔɛni ní tári faan lè.